BDU-da “Azərbaycan Respublikasının müasir ekosistemi: elmi-nəzəri tədqiqatlar və problemlər” mövzusunda Respublika elmi konfransı
Bakı Dövlət Universitetinin (BDU) Ekologiya və torpaqşünaslıq fakültəsinin təşkilatçılığı ilə “Şəhərsalma və Memarlıq İli”nə həsr olunmuş “Azərbaycan Respublikasının müasir ekosistemi: elmi-nəzəri tədqiqatlar və problemlər” mövzusunda Respublika elmi konfransı keçirilib.
Tədbir Dövlət himninin səsləndirilməsi ilə başlayıb. Daha sonra Ümummilli Lider Heydər Əliyevin və Azərbaycan Respublikasının ərazi bütövlüyü uğrunda canlarından keçən şəhidlərimizin əziz xatirələri bir dəqiqəlik sükutla yad edilib.
BDU-nun Elmi fəaliyyətin təşkili və innovasiyalar Mərkəzinin direktoru Farid Nağıyev konfransın gənc tədqiqatçıların inkişafı və yeni elmi əlaqələrin qurulması baxımından əhəmiyyətini vurğulayıb. BDU-da bu istiqamətdə həyata keçirilən elmi tədqiqatlar barədə məlumat verib, konfransın işinə uğurlar arzuıayıb.
BDU-nun Ekologiya və torpaqşünaslıq fakültəsinin dekanı Akif Ağbabalı Azərbaycanın müasir ekosisteminin vəziyyətindən bəhs edib. O çıxışında müstəqillik əldə edildikdən sonra respublikamızda yeni təsərrüfat və mülkiyyət formalarının yaranması, həmçinin erməni işğalı nəticəsində və sosial-iqtisadi vəziyyətdən irəli gələrək ətraf mühitə olan təsirlərin yeni mənzərəsi haqqında danışıb. Ekologiya və Təbii Sərvətlər Nazirliyinin, “Təmiz Şəhər” ASC-nin, Bərpa Olunan Enerji Mənbələri Dövlət Agentliyinin yaradılmasının əhəmiyyətini və respublikamızda ətraf mühitin yaxşılaşdırılması istiqamətində dövlət siyasətinin əsas prioritetlərini qeyd edib. Dövlət təşkilatları ilə yanaşı, ətraf mühitin mühafizəsi sahəsində ölkədəki qeyri-hökumət təşkilatlarının müsbət fəaliyyətini də vurğulayıb.
Elm və Təhsil Nazirliyinin Coğrafiya İnstitutunun Baş direktoru vəzifəsini icra edən Zaur İmrani çıxışında “Şəhərsalma və Memarlıq İli”nə həsr olunmuş konfransın əhəmiyyətindən danışaraq bildirib ki, bu məsələlərdə tarixi-memarlıq irsinin qorunması xüsusi həssaslıq kəsb edir.
BDU-nun Ekoloji kimya kafedrasının müdiri Sevinc Hacıyeva şəhər ekosisteminin əhəmiyyətindən, burada yaşıllıq zonalarının ekoloji funksiyalarından danışıb, ölkəmizin ev sahibliyi etdiyi COP29 və WUF13 kimi mötəbər tədbirlərin əhəmiyyətinə diqqət çəkib.
Memarlıq və İnşaat Universitetinin professoru Bəhram Əliyev qlobal iqlim dəyişikliyinin respublikamızın müasir ekosistemlərinə təsirlərindən danışıb. Xüsusilə torpaqların deqradasiyası, səhralaşma və su problemləri kimi istiqamətlərə diqqətin artırılmasının vacibliyini bildirib.
BDU-nun Torpaqşünaslıq və daşınmaz əmlakın kadastrı kafedrasının baş müəllimi Qismət Xanbabayev müasir yaşayış məntəqələrinin planlaşdırılması, bu zaman ekoloji standartların nəzərə alınmasından danışıb. Xüsusilə Qarabağ və Şərqi Zəngəzurda tətbiq edilən müasir yaşayış məntəqələri nümunələri olan “ağıllı şəhər” və “ağıllı kənd” modelləri haqqında ətraflı məlumat verib.
BDU-nun Coğrafi ekologiya kafedrasının professoru Şövqi Göyçayski çıxışında respublikamızın yenilənən müasir ekosisteminin mütəmadi tədqiqinin vacibliyini vurğulayıb. Bildirib ki, kafedralar, fakültələr və hətta universitetlərarası birgə əməkdaşlıq çərçivəsində tədqiqatlar apararaq yüksək elmi-nəzəri və praktiki nəticələrin alınması mümkündür.
BDU-nun Bioekologiya kafedrasının doktorantı Ramil Həsənov “Su-bataqlıq ekosistemlərinin bioloji müxtəlifliyin qorunmasında rolu və dayanıqlı idarə edilməsinin əhəmiyyəti”, Torpaqşünaslıq və daşınmaz əmlakın kadastrı kafedrasının müəllimi Şahnaz Amanova isə “SSP2-4.5 ssenarisi çərçivəsində HadGEM3-GC31-LL modeli ilə şəhərlərdə iqlim tendensiyalarının təhlili” mövzularında plenar məruzə ediblər.
Daha sonra konfrans işini bölmə iclasları ilə davam etdirib.
