BDU-da Azərbaycan Respublikasında “Elm günü”nə həsr edilmiş silsilə tədbirlərə başlanılıb
Bakı Dövlət Universitetində (BDU) 27 mart- Azərbaycan Respublikasında “Elm günü” ilə əlaqədar müasir elmin aktual problemlərinə həsr olunmuş silsilə tədbirlərə start verilib. Bununla əlaqədar fevralın 10-dan BDU-nun bütün fakültələrində elmi seminar, elmi və elmi-publisistik mühazirə və ustad dərslərinə başlanılıb.
Qeyd edək ki, artıq altı ildir BDU əməkdaşları arasında 27 mart - Azərbaycan Respublikasında “Elm günü”nə həsr olunmuş “İlin alimi” nominasiyası üzrə müsabiqə elan olunur. “İlin alimi” müsabiqəsinin məqsədi BDU-nun il ərzində aktiv elmi fəaliyyət göstərərək yüksək elmi nəticələrə nail olmuş, nüfuzlu jurnallarda və nəşrlərdə dərc olunmuş elmi məqalələri və digər elmi əsərləri olan, elmi işlərinə istinad olunan, həmçinin yüksək elmi-təşkilati fəaliyyəti ilə fərqlənmiş əməkdaşlarının mükafatlandırılmasıdır.