BDU Türkiyənin Balıkesir Universiteti ilə əməkdaşlığı genişləndirir

BEYNƏLMİLƏLLƏŞMƏ 18 Oktyabr 2024 11:46

Bakı Dövlət Universiteti (BDU) və Türkiyə Respublikasının Balıkesir Universiteti arasında anlaşma memorandumu imzalanıb.

Sənədi BDU-nun rektoru Elçin Babayev və Balıkesir Universitetinin rektoru Yücel Oğurlu imzalayıb.

Memorandumda hǝr iki universitetin nǝzdindǝ olan fakültǝ, institut vǝ kolleclǝrdǝ təlim-tədris prosesinin təkmilləşdirilməsi vǝ beynǝlxalq standartlara uyğunlaşdırılması məqsədilə birgə layihǝlǝrin, konfrans, sərgi, seminar, simpozium, qısamüddətli kursların, təlimlərin keçirilməsi, ortaq elmi-tədqiqatların aparılması nəzərdə tutulur. Həmçinin elmi jurnallarda birgə nəşrlər, ortaq akademik proqramların, tədris planlarının və sillabusların hazırlanması, təlimlərin keçirilməsi, akademik, inzibati heyətin, tələbə, magistrant, doktorant və tədqiqatçıların mübadiləsi kimi məsələlər də memorandumda öz əksini tapıb.

Əsası 1992-ci ildə qoyulmuş Balıkesir Universiteti Türkiyənin nüfuzlu universitetlərindən biridir. Balıkesir Universiteti “QS Qərbi Asiya reytinqi”ndə 61-ci pillədə qərarlaşır.

BEYNƏLMİLƏLLƏŞMƏ