Xalqımızın müstəqillik, dövlətçilik əzminin təntənəsi - Dövlət Suverenliyi Günü
Hər bir xalq üçün öz taleyinə sahib olmaq, müstəqil dövlətini yaradaraq inkişaf etdirmək onun ən böyük nailiyyətidir. Tarixin müxtəlif mərhələlərində üzləşdiyi çətinliklərə, işğala, məhrumiyyətlərə baxmayaraq, heç bir qüvvə xalqımızın müstəqillik, dövlətçilik əzmini sarsıda bilməyib. Azərbaycan xalqı bu gün öz müstəqil dövlətinə sahibdir, qəhrəman əsgər və zabitlərimizin, şəhidlərimizin qanı hesabına əldə edilmiş ərazi bütövlüyümüz, suverenliyimiz xalqımızın milli sərvətidir.
Müstəqillik və suverenlik yalnız hüquqi və siyasi kateqoriyalar deyil, həm də xalqın milli kimliyini, onun mədəni və tarixi varlığını təsdiqləyən dəyərlərdir. 2024-cü il 19 sentyabr tarixində Azərbaycan Respublikasının Prezidenti İlham Əliyevin Sərəncamı ilə təsis edilmiş Dövlət Suverenliyi Günü müasir Azərbaycan tarixinin ən mühüm dönüş nöqtələrindən biridir. 20 sentyabr 2025-ci il tarixində isə ölkəmiz bu günü ilk dəfə rəsmi olaraq qeyd edir.
1991-ci ilin oktyabrında qəbul edilən "Azərbaycan Respublikasının Dövlət Müstəqilliyi haqqında Konstitusiya Aktı" ilə Azərbaycan rəsmi şəkildə Sovetlər İttifaqından ayrılaraq, öz müstəqil dövlət statusunu bərpa etsə də, təəssüf ki, mənfur qonşularımızın təcavüzü bizə suverenliyimizi tam bərpa etməyə imkan vermirdi. Bu ağrı və acılarla, çətinliklərlə dolu proses 30 ildən artıq davam etdi. Azərbaycanın ərazi bütövlüyünün və dövlət suverenliyinin bərpası istiqamətində tarixi iradənin ortaya qoyulması 2020-ci ildə 44 günlük Vətən müharibəsi ilə yeni mərhələyə keçdi. Müzəffər Ali Baş Komandan İlham Əliyevin rəhbərliyi ilə Azərbaycan Ordusu işğal altında olan torpaqlarımızı düşmən tapdağından azad etdi. BMT qətnamələrinin 30 il ərzində həyata keçirilməyən müddəaları real güc və siyasi iradə ilə icra edildi. Bu zəfər 2023-cü ilin 19-20 sentyabr tarixlərində keçirilmiş cəmi 23 saatlıq lokal antiterror tədbirləri ilə tamamlandı. Azərbaycan Konstitusiyası və beynəlxalq hüquq çərçivəsində keçirilən bu tədbirlər nəticəsində Qarabağ bölgəsində suverenliyin tam bərpası həyata keçirildi. Separatçı qurumun ləğvi və dövlət hakimiyyətinin tam bərpası Azərbaycanın tarixində yeni dövrün başlanğıcını qoydu. 2023-cü il sentyabrın 20-də Müzəffər Ali Baş Komandan, Azərbaycan Respublikasının Prezidenti İlham Əliyev Xankəndidə üçrəngli bayrağımızı qaldırdı. Bu, Azərbaycan Respublikasının bütün ərazisində qanunun aliliyinin təmin olunduğunun, dövlət suverenliyinin tam bərpa olunduğunun sübutu idi.
Dövlət suverenliyimizin bərpası Azərbaycanın müstəqil dövlət olaraq gücünə güc qatdı və sonrakı uğurları üçün möhkəm təməl yaratdı. Bu il avqustun 8-də müstəqil dövlətimiz növbəti şanlı qələbəsinə - “Azərbaycan Respublikası və Ermənistan Respublikası arasında sülhün və dövlətlərarası münasibətlərin təsis edilməsi haqqında Saziş"in ABŞ Prezidentinin iştirakı ilə paraflanmasına nail oldu. Bu, ölkəmiz üçün regionda davamlı və dayanıqlı sülhün təmin olunması baxımından mühüm tarixi hadisədir. Sülh müqaviləsinin mətni paraflanmaqla siyasi və hərbi sabitliyin möhkəmləndirilməsi, sülh və əmin-amanlığın bərqərar edilməsi, eləcə də iqtisadi yüksəlişə nail olunması yolunda tarixi irəliləyiş əldə olundu. Mövcudluğu siyasi fəaliyyətsizliyin və region dövlətlərinin taleyinə biganəliyin rəmzinə çevrilmiş Minsk Qrupunun ləğvi üçün birgə müraciət edilməsi barədə razılıq əldə edildi və Minsk Qrupu tarixin arxivinə göndərildi. Ermənistanın Azərbaycana qarşı ərazi iddialarından imtina etməsi təsdiqləndi. Bununla yanaşı, ölkəmizin əsas hissəsi ilə Naxçıvan arasında maneəsiz gediş-gəlişi təmin edəcək Zəngəzur dəhlizinin açılması ilə bağlı məsələ razılaşdırıldı. Regionda sülhün əldə edilməsi istiqamətində uzun müddət davam edən danışıqlar məhz möhtərəm Prezidentimizin qətiyyəti və şəxsi nüfuzu sayəsində, məqsədyönlü xarici siyasəti nəticəsində öz bəhrəsini verdi.
Dövlət Suverenliyi Gününün təsis edilməsi 1991-ci ildə müstəqilliyin bərpası ilə başlayan tarixi yolun məntiqi nəticəsi, ərazi bütövlüyü və dövlət suverenliyi uğrunda uzun illər aparılan mübarizənin zirvəsidir. Bu hadisə yalnız dövlətçilik tariximiz üçün deyil, həm də milli kimliyimizin möhkəmlənməsi baxımından böyük əhəmiyyət daşıyır. Dövlət Suverenliyi Günü xalqımızın keçdiyi çətin, lakin şərəfli mübarizə yolunu bir daha xatırladır və gələcək nəsillərə ötürür. Dövlət Suverenliyi Günü xalqımızın müstəqillik əzmini, dövlətimizin siyasi iradəsini və beynəlxalq arenada qazandığı mövqeyi bir daha vurğulayır.
Suverenlik Azərbaycan xalqının, dövlətinin milli sərvətidir. Bu sərvəti canı, qanı ilə qorumaq hər birimizin vətəndaşlıq borcudur. Bu yolda canını fəda edən şəhidlərimizin ruhu şad olsun.
Dövlət Suverenliyi Gününüz mübarək!