Özbəkistan ali təhsil müəssisələrinin nümayəndələri BDU-da
Özbəkistanın 15-dək nüfuzlu ali təhsil müəssisəsinin nümayəndələri Bakı Dövlət Universitetində (BDU) olublar.
Qonaqları salamlayan BDU-nun rektoru ortaq kökə, tarixə malik, qardaş ölkələr olan Azərbaycan və Özbəkistan arasında münasibətlərin yüksələn xətt üzrə inkişaf etdiyini bildirib. O qeyd edib ki, iki qardaş dövlət siyasi, iqtisadi, humanitar, o cümlədən mədəniyyət, elm, təhsil istiqamətlərində uğurlu əməkdaşlıq edir. BDU da bu əməkdaşlığa öz töhfəsini verməkdədir. Son bir neçə ildə BDU Özbəkistanın ali təhsil müəssisələri ilə əməkdaşlıq əlaqələrini daha da gücləndirib. BDU Özbəkistan universitetləri ilə əməkdaşlıq müqavilələri imzalayıb, tələbə və müəllim mübadiləsi proqramları həyata keçirib: “Son iki ayda Özbəkistanın müxtəlif universitetlərindən onlarla professor-müəllim mübadilə proqramları çərçivəsində BDU-ya gəlib, təcrübə keçib. May ayında da bu proses davam edəcək. BDU və Özbəkistan ali təhsil müəssisələrinin ikili diplom proqramları, birgə elmi tədqiqatlar, ortaq konfranslar, sosial tədbirlər həyata keçirməklə bağlı daha böyük potensialı var. Birgə layihə və elmi tədqiqatlar hər iki ölkənin ali təhsil sisteminin inkişafına mühüm töhfə verməklə yanaşı, regionun elmi potensialının gücləndirilməsi, təhsilin keyfiyyətinin artırılması, elm və təhsil sahəsində daha böyük uğurlara imza atmasına şərait yaradacaq”.
Qonaqlar daha sonra BDU-nun “Eko Məkan”ı, Mədəniyyət-Yaradıcılıq Mərkəzi, Elmi Kitabxanasında olublar. Onlar Biologiya, Filologiya, Fizika, Beynəlxalq münasibətlər və iqtisadiyyat, İnformasiya və sənəd menecmenti, Sosial elmlər və psixologiya fakültələrinin tədris, elmi fəaliyyəti ilə tanış olub, əməkdaşlığı daha da gücləndirməklə bağlı müzakirələr aparıblar.
