Məhkəmə-Hüquq Şurasının Aparat rəhbəri Kərəm Mansurov BDU-da ustad dərsi keçib
Bakı Dövlət Universitetinin (BDU) Hüquq fakültəsinin Tələbə Gənclər Təşkilatının (TGT) "Master klass" layihəsi çərçivəsində növbəti görüş keçirilib.
Tədbirdə Məhkəmə-Hüquq Şurasının Aparat rəhbəri Kərəm Mansurov çıxış edib. Görüş "Məhkəmə-Hüquq Şurası məhkəmə hakimiyyətinin özünüidarə orqanı kimi" mövzusuna həsr olunub.
Hüquq fakültəsinin dekanı, hüquq elmləri üzrə fəlsəfə doktoru, dosent Zaur Əliyev hüquq-mühafizə orqanları sistemində zəngin təcrübəyə malik olan və tələbəlik illərində fakültənin Tələbə Gənclər Təşkilatının sədri kimi fəaliyyət göstərən Kərəm Mansurovun peşəkar fəaliyyətinin hüquqşünas gənclər üçün nümunəvi olduğunu qeyd edib. Dekan bu cür birbaşa ünsiyyət platformalarının tələbələrin peşəkar inkişafına və mütəxəssis kimi formalaşmasına mühüm töhfə verəcəyinə əminliyini ifadə edib.
Kərəm Mansurov Məhkəmə-Hüquq Şurasının təkamül yolu, institutun hüquqi statusu və fəaliyyət prinsipləri barədə ətraflı məlumat verib. O, fərqli hüquq sistemlərində bu təsisatın müxtəlif adlarla fəaliyyət göstərməsinə rəğmən, Azərbaycan modelinin məhkəmə müstəqilliyinin təmin olunmasında və ədalət mühakiməsinin keyfiyyətinin artırılmasında oynadığı strateji rolu diqqətə çatdırıb. Çıxış zamanı məhkəmə sistemində reallaşdırılan islahatlar, məhkəmələrin institusional gücləndirilməsi və gələcək inkişaf istiqamətləri kimi mühüm məqamlara toxunulub.
İnteraktiv formatda davam edən görüşdə Kərəm Mansurov tələbələrin Məhkəmə-Hüquq Şurasının formalaşdırılması, hakimlərin seçilməsi və təyinatı prosedurları, habelə qurumun cari fəaliyyəti ilə bağlı çoxsaylı suallarını cavablandırıb.
