BDU XII Bakı Beynəlxalq Kitab Sərgisində: “Birinci Türkoloji Qurultayın dərsləri” kitabının təqdimatı
-lg.jpg)
XII Bakı Beynəlxalq Kitab Sərgisi çərçivəsində Bakı Dövlət Universitetinin (BDU) Ümumi dilçilik kafedrasının müdiri, akademik Nizami Cəfərovun “Birinci Türkoloji Qurultayın dərsləri” kitabının təqdimat mərasimi keçirilib.
Akademik Nizami Cəfərov nəşrin ərsəyə gəlmə məqsədi, Birinci Türkoloji Qurultayın tarixi əhəmiyyəti və onun müasir türkoloji tədqiqatlar üçün aktuallığı barədə ətraflı məlumat verib. O, 1926-cı ildə Bakıda keçirilmiş Birinci Türkoloji Qurultayın türk xalqlarının elmi, mədəni və mənəvi inteqrasiyasında mühüm mərhələ olduğunu vurğulayıb. Müəllif qurultayda müzakirə olunan məsələlərin, irəli sürülən elmi ideyaların və qəbul edilən qərarların bu gün də Türk dünyası üçün əhəmiyyətini qoruduğunu bildirib. Qeyd edib ki, həmin tarixi hadisənin dərslərini öyrənmək türk xalqlarının ortaq elmi və mədəni irsinin dərk edilməsi, eləcə də müasir türkoloji fikrin inkişafı baxımından mühüm əhəmiyyət daşıyır. Ortaq tarixi və dilçilik irsinin öyrənilməsi, elmi ənənələrin davam etdirilməsi türkoloji tədqiqatların qarşısında duran mühüm vəzifələrdəndir.
AMEA-nın Məhəmməd Füzuli adına Əlyazmalar İnstitutunun direktoru, akademik Teymur Kərimli çıxışında Birinci Türkoloji Qurultayın elmi konsepsiyasının və dərslərinin müasir dövrdə də aktuallığını qoruduğunu bildirib. “Birinci Türkoloji Qurultayın dərsləri” kitabının bu irsin araşdırılması və gələcək nəsillərə çatdırılmasındakı rolunu yüksək qiymətləndirib.
BDU-nun Elmi Kitabxanasının müdiri Nigar İsmayılova, Filologiya fakültəsinin sosial məsələlər və tələbələrlə iş üzrə dekan müavini Anar Fərəcov çıxışlarında belə nəşrlərin milli elmi irsin qorunması baxımından əhəmiyyət daşıdığını, tələbə-gənclərin türk xalqlarının ortaq dilçilik irsi haqqında biliklərinin genişləndirilməsinə imkan yaratdığını diqqətə çatdırıblar.
Sonda iştirakçıların sualları cavablandırılıb, kitabda əksini tapan məsələlər, Birinci Türkoloji Qurultayın tarixi irsi, türk dillərinin inkişafı və ortaq əlifba mövzuları ətrafında fikir mübadiləsi aparılıb.
