AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) rektoru Elçin Babayev və Əl-Fərabi adına Qazax Milli Universitetinin (QMU) rektoru Janseit Tuymebayev arasında görüş keçirilib.

Görüşdə hər iki universitet arasında mövcud əməkdaşlığın möhkəmləndirilməsi və yeni istiqamətlərdə inkişaf etdirilməsi barədə geniş müzakirələr aparılıb. İki universitet arasında 2020-ci ildə imzalanmış müqaviləyə əsasən həyata keçirilən “Dəniz və enerji hüququ” ixtisaslaşması üzrə ikili diplom proqramının uğurları vurğulanıb. Bu proqram çərçivəsində magistratura səviyyəsində ingilis dilində birgə tədris prosesi aparılır. Tələbələrə iki universitetin resursları və təcrübəsi əsasında yüksək keyfiyyətli təhsil almaq imkanı yaradılır.

Rektorlar Elçin Babayev və Janseit Tuymebayev bu proqramın regionda hüquq təhsili sahəsində beynəlxalq səviyyədə tanınmış mütəxəssislər yetişdirmək baxımından əhəmiyyətini vurğulayıblar. Tərəflər proqramın daha da inkişaf etdirilməsi və yayılması imkanlarını müzakirə ediblər.

Görüşdə BDU və QMU-nun müştərək tədqiqat layihələri ilə bağlı gələcək planları da müzakirə olunub. Elmi əməkdaşlığın genişləndirilməsi üçün birgə elmi tədqiqatların təşkili, ortaq simpozium və konfransların keçirilməsi qərarlaşdırılıb. Hər iki universitetin tədqiqat imkanlarını birləşdirməklə, elmin aktual sahələrində innovativ həllərin tapılması üçün vacib platforma yaratmağın əhəmiyyətindən bəhs olunub.

Rektorlar tələbə və müəllim mübadiləsinin də əhəmiyyətini qeyd ediblər. Onlar mübadilə proqramlarının hər iki universitetin tələbələrinin beynəlxalq təcrübə qazanması, ümumi dünyagörüşlərinin genişlənməsi və mədəniyyətlərarası dialoqun inkişafı baxımından əhəmiyyətli olduğunu vurğulayıblar. Rektorlar iki universitet arasında qarşılıqlı təhsil və elm layihələrinin həyata keçirilməsi üçün uyğun imkanların yaradılması və əməkdaşlıq sahəsində müxtəlif fəaliyyətlərin təşkili barədə də fikir mübadiləsi aparıblar.

Bu görüş universitetlər arasında əməkdaşlığın inkişafı istiqamətində mühüm addım kimi qiymətləndirilir və Azərbaycan-Qazaxıstan elm və təhsil münasibətlərinin daha da möhkəmlənməsinə töhfə verəcək.