BDU rektoru Çinin Anhui Universitetində təhsil alan Azərbaycandan olan tələbələrlə görüşüb
Bakı Dövlət Universitetinin (BDU) rektoru Elçin Babayev Çinin Hefei şəhərinə səfəri çərçivəsində Anhui Universitetində təhsil alan BDU-dan və Azərbaycandan olan tələbələrlə görüşüb. Görüşdə həmçinin Anhui Universitetinin Beynəlxalq Təhsil Məktəbinin rəhbərliyi, o cümlədən dekanı Hu Jian da iştirak edib. Görüş zamanı tələbələrin beynəlxalq təhsil təcrübələri, elmi, təhsil və sosial fəaliyyəti, həmçinin gələcək karyera perspektivləri müzakirə olunub.
Hazırda bir qrup BDU tələbəsi Anhui Universitetində ikili diplom çərçivəsində təhsil alır. Bu proqram BDU, Çin Təhsil Nazirliyinin Dil Təhsili və Əməkdaşlıq Mərkəzi və Anhui Universiteti arasında “Beynəlxalq Çin dili təhsili” birgə bakalavr proqramı üzrə imzalanmış üçtərəfli müqavilə əsasında reallaşdırılır. Proqramın məqsədi Çin və Azərbaycan arasında təhsil mübadiləsini təşviq etmək, universitetlər arasında əməkdaşlığı gücləndirmək və Anhui Universitetinin Çin dili və ədəbiyyatı sahəsindəki üstünlüklərindən tam şəkildə yararlanmaqdır.
Proqram çərçivəsində Çin dili ixtisası üzrə təhsil alan tələbələr birinci və ikinci kursu BDU-da tamamlayır, üçüncü və dördüncü kursda isə Anhui Universitetində təhsil alırlar. Həmçinin, müvafiq ixtisaslar üzrə təhsil alan tələbələr beynəlxalq təhsil və mədəni mübadilə imkanlarından yararlanaraq, akademik biliklərini və praktik bacarıqlarını artırırlar.
Görüşdə BDU-nun nəzdində fəaliyyət göstərən Konfutsi İnstitutu çərçivəsində Çində təhsil təcrübələrini zənginləşdirmək məqsədilə müxtəlif təqaüd proqramlarına cəlb olunmuş tələbə və dinləyicilər də iştirak ediblər.
Rektor Elçin Babayev tələbələrin bu uğurlarını yüksək qiymətləndirərək, onların akademik və şəxsi karyera inkişaflarının BDU-nun strateji məqsədlərinə xidmət etdiyini qeyd edib. Anhui Universitetinin Beynəlxalq Təhsil Məktəbinin dekanı Hu Jian isə bildirib ki, tələbələrin akademik və şəxsi inkişafı yüksək səviyyədə dəstəklənir. Tələbələr də öz növbəsində görüş zamanı təhsil proqramlarının onlara verdiyi imkanları, yeni mədəniyyətləri tanımaq və akademik biliklərini genişləndirmək təcrübələrini paylaşıblar. Onlar BDU-ya və Anhui Universitetinə göstərilən diqqət və dəstəyə görə minnətdarlıqlarını bildirib və beynəlxalq təhsil təcrübələrinin şəxsi və peşəkar inkişaflarında böyük rol oynadığını vurğulayıblar.
