BDU-da Məzunlar Cəmiyyətinin ilk seminarı: "Süni intellektdən ümumi intellektə doğru"
BDU Bakı Dövlət Universitetinin (BDU) Məzunlar Cəmiyyətinin silsilə seminarlarına başlanılıb. Layihənin ilk qonağı BDU məzunu, AZAI TECH şirkətinin qurucusu və rəhbəri Üzeyir Süleymanov olub. O, tələbələrə "Süni intellektdən ümumi intellektə doğru" mövzusunda seminar keçib.
BDU rektoru Elçin Babayev hər universitetin ən böyük sərvətinin onun tələbə və məzunları olduğunu bildirib. Rektor qeyd edib ki, BDU hər zaman öz məzunları ilə fəxr edib. BDU-nun ən böyük məzunu xalqımızın Ümummilli Lideri Heydər Əliyevdir: “Hazırda Universitetin minlərlə məzunu Azərbaycanda və dünyanın müxtəlif ölkələrində uğurla çalışır. Məhz həmin məzunlar tərəfindən BDU Məzunları Cəmiyyəti yaradılıb. BDU məzunları Universitetin inkişafına oz töhfələrini vermək niyyətindədirlər. Bu layihə də məhz buna xidmət edir. Məzunlarımız öz uğur hekayələrini, bilik və təcrübələrini tələbələrlə bölüşəcəklər”.
Rektor son illərdə bütün dünyada süni intellekt, maşın həlləri, kibertəhlükəsizlik kimi mövzuların aktual olduğunu bildirib. Diqqətə çatdırıb ki, BDU-da da bu istiqamətdə, xüsusilə süni intellektlə bağlı həm tədris prosesi, həm də tədqiqatlar aparılır. BDU-da Süni intellekt etikası kafedrası yaradılıb. Süni intellektdən istifadənin gündən-günə artması onun yaratdığı problemləri də dərindən araşdırmağı tələb edir.
Layihənin qonağı Üzeyir Süleymanov BDU-nun bütün məzunlarının həyatında və karyerasında dərin iz buraxdığını bildirib, layihənin ilk qonağı olmaqdan məmnunluğunu ifadə edib. O, süni intellekt texnologiyalarının yaradılması və onun müxtəlif problemlərin həllində istifadəsinin aktual olduğunu bildirib. Süni intellektin yaradılması və inkişaf mərhələlərinə nəzər salıb, Azərbaycanda bu istiqamətdə təklif olunan həlləri AZAI TECH şirkətinin timsalında izah edib. Süni intellektin bütün müsbət cəhətlərinə baxmayaq, insan zəkasının ondan üstün olduğunu vurğulayıb: “Süni intellektin etik problemlər doğurduğu da faktdır. Süni intellektdən istifadə vacibdir, amma onun nəticələrinə kortəbii baxılmamalıdır, bunlar təhlil olunmalıdır”.
Sonda Üzeyir Süleymanov müəllim və tələbələrin suallarını cavablandırıb, tələbələrə ingilis dilini və proqramlaşdırma dillərindən birini öyrənməyi tövsiyə edib.
