BDU-da “Memarlıq və şəhər sosiologiyası” adlı tədbir
Bakı Dövlət Universitetinin (BDU) Sosial elmlər və psixologiya fakültəsinin Sosial iş kafedrasının təşkilatçılığı ilə “Memarlıq və şəhər sosiologiyası” adlı tədbir keçirilib.
Sosial iş kafedrasının müdiri Üzeyir Şəfiyev qeyd edib ki, Azərbaycan Respublikasının Prezidenti İlham Əliyevin 22 dekabr 2025-ci il Sərəncamı ilə 2026-cı il “Şəhərsalma və Memarlıq İli” elan edilib. Azərbaycanın BMT-nin Məskunlaşma Proqramı ilə əməkdaşlığı, milli şəhərsalma forumları və 2026-cı ildə 17-22 may tarixlərində Bakıda keçiriləcək Ümumdünya Şəhərsalma Forumunun 13-cü sessiyası (WUF13) ölkəmizin davamlı urbanizasiya prosesindəki artan rolunu və beynəlxalq əməkdaşlığının uğurunu nümayiş etdirir.
Kafedra müdiri diqqətə çatdırıb ki, “Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri” mövzusunda keçiriləcək WUF13 şəhərsalma ilə bağlı ən aktual məsələləri müzakirə etmək üçün dünyanın müxtəlif ölkələrindən olan hökumət nümayəndələri, alimlər, biznesmenlər, icma rəhbərləri və digər maraqlı tərəfləri bir araya gətirən qlobal platformadır.
2026-cı ilin “Şəhərsalma və Memarlıq İli” elan edilməsinin təsadüfi olmadığını bildirən Üzeyir Şəfiyev Azərbaycan Prezidenti İlham Əliyevin bu istiqamətdə çıxışlarının şəhər sosiologiyası baxımından mühüm məna kəsb etdiyini vurğulayıb: “Hazırda respublikamızda paytaxtdan başlayaraq ölkənin bütün bölgələrinə qədər genişmiqyaslı şəhərsalma layihələri həyata keçirilir. ”Bakı şəhərinin 2040-cı ilədək inkişafına dair Baş planı”nın əsas xüsusiyyətlərindən biri çoxmərkəzli inkişaf modelinin tətbiqidir. Bu modelə əsasən, bütün fəaliyyətlərin bir mərkəzdə cəmlənməsi əvəzinə, Bakı şəhəri boyunca bir-biri ilə əlaqəli mərkəzlər və alt-mərkəzlər şəbəkəsi formalaşdırılır”.
Sonra Üzeyir Şəfiyev Qərb tədqiqatçılarının şəhər sosiologiyası istiqamətindəki tədqiqatlarına istinad edərək, sosial sahə mütəxəssislərinin “Şəhərsalma və Memarlıq İli” çərçivəsində həyata keçirə biləcəkləri layihələrlə bağlı təkliflərini səsləndirib.
Tədbirin sonunda tələbələri maraqlandıran suallar cavablandırılıb.
