BDU-da “FUTURE17 SDG Challenge” proqramının ilkin mərhələsi yekunlaşıb
Bakı Dövlət Universitetində (BDU) nüfuzlu beynəlxalq reytinq agentliyi olan “Quacquarelli Symonds” (QS) və Böyük Britaniyanın Ekseter Universitetinin birgə təşəbbüsü olan “FUTURE17 SDG Challenge” beynəlxalq proqramının 4 həftəlik ilkin hazırlıq mərhələsinin başa çatması ilə əlaqədar görüş keçirilib. Tədbirdə BDU rektorunun keyfiyyət təminatı üzrə müşaviri Asiman İlyasov, proqram iştirakçıları və mentorlar iştirak ediblər.
Görüşdə ilkin mərhələnin nəticələri, növbəti addımlar və komanda fəaliyyətinin təşkili müzakirə olunub. BDU rektorunun keyfiyyət təminatı üzrə müşaviri Asiman İlyasov beynəlxalq əməkdaşlığın tələbələrin peşəkar inkişafına, akademik biliklərin praktiki fəaliyyətlə əlaqələndirilməsinə və qlobal çağırışlara innovativ həllər hazırlanmasına verdiyi töhfəni vurğulayıb.
Tədbirdə tələbələrin layihə ideyaları dinlənilib, icra prosesində yarana biləcək çətinliklər və beynəlxalq tərəfdaşlarla əməkdaşlıq imkanları ətrafında fikir mübadiləsi aparılıb.
Proqram çərçivəsində BDU tələbələri müxtəlif ölkələrdən olan tərəfdaş təşkilatlarla əməkdaşlıq edərək davamlı inkişafın müxtəlif istiqamətlərini əhatə edən 27 layihə üzərində çalışırlar. Layihələr məşğulluqda bərabər imkanların genişləndirilməsi, təhsil və səhiyyə xidmətlərinin əlçatanlığının artırılması, ətraf mühitin mühafizəsi, iqlim dəyişikliyi ilə mübarizə, rəqəmsal texnologiyalar, süni intellekt, gənclərin iştirakı və dayanıqlı kənd təsərrüfatı kimi sahələri əhatə edir. Təşəbbüslər arasında “Məşğulluqda bərabər imkanların yaradılmasına maneələrin aradan qaldırılması”, “Dəyişiklik nəfəsi: Təmiz hava məktəblərinin qlobal şəbəkəsinin genişləndirilməsi”, “Səhiyyə və diaqnostika üçün əlçatan, münasib qiymətli və süni intellekt əsaslı həllin hazırlanması”, “İnkişaf ərazilərinin operativ ekoloji ilkin qiymətləndirilməsi üçün rəqəmsal alətin hazırlanması” və “Dayanıqlı akvaponika sistemlərində qərarların qəbulu üçün etik süni intellekt” kimi layihələr yer alır. Layihələr Birləşmiş Krallıq, Portuqaliya, Nigeriya, Yaponiya, İndoneziya və Yeni Zelandiyadan olan təşkilatlarla əməkdaşlıq çərçivəsində icra edilir.
Prosesdə fəal iştirak edən BDU mentorları tələbələrə ideyaların inkişafı və innovativ həllərin tətbiqi istiqamətində dəstək göstərirlər. Proqramın növbəti mərhələsində beynəlxalq komandalarla birgə araşdırmaların aparılması və nəticəyönümlü təkliflərin hazırlanması nəzərdə tutulur ki, bu da tələbələrin tənqidi düşünmə, kommunikasiya və layihə idarəetməsi bacarıqlarını inkişaf etdirəcək.
Qeyd edək ki, QS və Böyük Britaniyanın Ekseter Universitetinin birgə təşəbbüsü olan “FUTURE17 SDG Challenge” beynəlxalq proqramı tələbələrin Birləşmiş Millətlər Təşkilatının Dayanıqlı İnkişaf Məqsədləri ilə əlaqəli real problemlərin həllinə yönəlmiş layihələr hazırlamasını dəstəkləyir. Proqram akademik biliklərin praktiki fəaliyyətlə əlaqələndirilməsinə, beynəlxalq tərəfdaşlarla əməkdaşlıq təcrübəsinin qazanılmasına və qlobal dayanıqlı inkişaf təşəbbüslərinə töhfə verilməsinə şərait yaradır. BDU proqramın tərəfdaşları sırasında yer alır.
