AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Filologiya fakültəsinin Türkologiya kafedrasında Özbəkistanın Daşkənd Dövlət Hüquq Universitetinin əməkdaşları Amina Fəttahova, Nilufər Bəhramova və Dilaron Raximova ilə görüş keçirilib.

Nümayəndə heyətinin üzvü Dilaron Raximova “Qafur Qulam şeirlərində ictimai ümumiləşdirmələr” mövzusunda çıxış edib, böyük şairin yaradıcılığında yer alan ictimai motivlərə toxunub. Natiq çıxışı zamanı Qafur Qulamın şeirlərini özbək dilində səsləndirib, onların bədii-ictimai məziyyətlərindən bəhs edib.

Türkologiya kafedrasının professorları - kafedra müdiri Məhərrəm Məmmədov və Firuzə Ağayeva, dosentlər Qızılgül Abdullayeva, Kəmalə Nəcəfova, filologiya üzrə fəlsəfə doktoru Aqşin Əliyev və BDU-nun Beynəlxalq əlaqələr şöbəsinin əməkdaşı Sevinc Məmmədova çıxışlarında Filologiya fakültəsində tanınmış özbək şairi Qafur Qulamın yaradıcılığının geniş tədris edildiyini vurğulayıb, özbək və Azərbaycan ədəbiyyatları arasında minilliklər boyu etnik-dini yaxınlıq və bağlılıqdan irəli gələn oxşarlıq, doğmalıq olduğunu bildiriblər.

Görüşdə Azərbaycan-Özbəkistan arasında siyasi-iqtisadi, elmi-mədəni və təhsil sahəsindəki sıx əməkdaşlıqdan danışılıb, hər iki  universitetdə bu əlaqələrin inkişaf etdirilməsi üçün böyük perspektivlərin olduğu qeyd olunub.