BDU-nun 105 illik yubileyi çərçivəsində Geologiya fakültəsinin təqdimatı
Bakı Dövlət Universitetinin (BDU) 105 illik yubileyi çərçivəsində Geologiya fakültəsinin təqdimatı keçirilib.
Əvvəlcə Dövlət himni səsləndirilib. Ulu Öndər Heydər Əliyevin və torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.
Mərasimdə çıxış edən BDU-nun tədrisin təşkili və təlim texnologiyaları üzrə prorektoru Fərda İmanov Universitetin 105 illiyi çərçivəsində hər bir fakültənin təqdimatının keçirilməsinin həm tarixi ekskurs, həm də hesabatlılıq baxımından faydalı olduğunu vurğulayıb. Qeyd edib ki, 1919-cu ildə əsası qoyulan və ilk Avropa tipli ali təhsil müəssisəsi olan Bakı Dövlət Universitetində yarandığı gündən tədris hər dövrün tələbinə uyğun olaraq ən yaxşı səviyyədə təşkil edilib və edilir. 80 illik tarixə malik olan və Azərbaycanı dünyaya tanıdan sərvətlərin aşkara çıxarılmasında peşəkar kadr hazırlığını həyata keçirən Geologiya fakültəsi də ölkəmizin geoloqlar məktəbinin əsas ocağıdır. Görkəmli geoloqlar nəslinin yetişməsinə öz əvəzsiz töhfəsini verən Geologiya fakültəsi müasir günümüzdə də aktual olan istiqamətlər üzrə kadr hazırlığını həyata keçirir. Belə ki, fakütədə “Geologiya”, “Geologiya və geofizika mühəndisliyi”, “Mədən mühəndisliyi” və “Meliorasiya mühəndisliyi” ixtisasları üzrə mütəxəssislər hazırlanır. 4 istiqamət, 11 ixtisaslaşma üzrə magistr, 7 ixtisas üzrə isə fəlsəfə və elmlər doktoru hazırlığı həyata keçirilir. Bütün bunlar Geologiya fakültəsinin gələcək uğurlu fəaliyyəti ilə bağlı böyük ümidlər yaradır.
Sonra Geologiya fakültəsinin fəaliyyətini əks etdirən videoçarx nümayiş olunub.
BDU-nun Faydalı qazıntılar kafedrasının müdiri, akademik Vasif Babazadə isə bildirib ki, ötən əsrin 50-ci illərindən fakültə alimlərinin geologiya elminin inkişafında, yüksəkixtisaslı mühəndis-geoloq kadrlarının hazırlanmasında, faydalı qazıntı yataqlarının öyrənilməsində və işlənilməsində müstəsna xidmətləri olub. Onlardan AMEA-nın həqiqi üzvləri Musa Əliyev, Əliəşrəf Məmmədov, Şəfaət Mehdiyev, Mirəli Qaşqay, Ədhəm Şıxəlibəyli, Arif İsmayılzadə, Akif Əlizadə, müxbir üzvləri Qədir Sultanov, Xudu Məmmədov, Tələt Kəngərli və digərlərinin adlarını çəkmək olar. Fakültədə çalışan alimlərdən akademiklər Şəfaət Mehdiyev və Faiq Bağırzadə müxtəlif illərdə BDU-nun rektoru kimi çalışıblar. Bütün bunlar görkəmli geoloqların ali təhsilin inkişafı istiqamətində göstərdikləri yüksək fədakarlığın bariz nümunəsidir.
Geologiya fakültəsinin dekanı Mamoy Mansurov fakültənin tədris, elmi fəaliyyəti ilə bağlı məlumat verib. Bildirib ki, Ümumi və tarixi geologiya, Hidrogeologiya və mühəndis geologiyası, Seysmologiya və Yer təkinin fizikası, Faydalı qazıntılar və Kristalloqrafiya, mineralogiya və geokimya kafedraları üzrə aparılan tədris fəaliyyəti zamanı tələbələr praktik fəaliyyətə də cəlb edilirlər. Fakültənin əsas istehsalat bazası onun yetişdirdiyi məzunların çalışdıqları və rəhbərlik etdikləri “Azərbaijan International Mining Company Limited” Şirkətinin, habelə “AzərGold” QSC-nin mədənləri, Ekoloji və Təbii Sərvətlər Nazirliyinin Geoloji Kəşfiyyat və Dövlət Mineral Xammal Ehtiyatlarından İstifadə agentlikləri, Elm və Təhsil Nazirliyinin Geologiya və Geofizika, Neft və Qaz institutları, Respublika Seysmoloji Xidmət Mərkəzi, Azərbaycan Melorasiya və Su Təsərrüfatı ASC-nin Hidrogeoloji-Meliorativ Xidmət İdarəsidir. Fakültə məzunları SOCAR, BP kimi neft şirkətlərində, sənaye və mülki tikinti obyektlərinin ərazisində mühəndis-geoloji işləri aparan təşkilatlarda mühəndis-geoloq kimi çalışırlar. Son illər fakültənin 100-ə qədər məzunu təcrübə keçdikləri şirkətlərdə müsabiqə yolu ilə işə qəbul olunublar.
Daha sonra çıxış edən Geologiya və Geofizika İnstitutunun baş direktoru, akademik Akif Əlizadə, Fövqəladə Hallar Nazirliyinin Regional mərkəzlərlə işin təşkili, layihələrin idarə edilməsi və təhsil məsələləri üzrə Baş idarəsinin rəis müavini Gündüz Həmzəyev, “Azerbaijan International Mining Company Limited” şirkətinin Geoloji kəşfiyyat şöbəsinin müdiri Anar Vəliyev və I kurs tələbəsi Anaxanım Dadaşova fakültənin ölkənin həyatında oynadığı əhəmiyyətli roldan söz açaraq, bundan sonrakı fəaliyyətində uğurlar arzu ediblər.
Tədbir fakültənin tələbələri tərəfindən hazırlanan ədəbi-bədii kompozisiya ilə davam edib.
