“BDU könüllüləri” təşkilatının Hüquq fakültəsinin tələbələri üçün silsilə təlim proqramı davam edir
“BDU könüllüləri” təşkilatının və Hüquq fakültəsinin Mülki proses və kommersiya hüququ kafedrasının birgə təşkilatçılığı ilə ötən ilin mart ayından başlanılan silsilə təlim proqramı davam edir.
Proqram çərçivəsində "Akademik yazı və etika kursu” adlı növbəti təlim keçirilib. Təlim Türkiyənin Ankara Hacı Bayram Vəli Universitetinin doktorantı, BDU-nun Kriminalistika və məhkəmə ekspertizası kafedrasının müəllimi Röyal Məhərrəmov tərəfindən keçirilib.
Təlimdə elmi araşdırmalarda istifadə olunan metodoloji yanaşmalar, akademik yazının strukturu, tədqiqat etikasının əsas prinsipləri və müxtəlif tədqiqat növləri - kəmiyyət və keyfiyyət metodlarının tətbiq sahələri izah olunub.
Sonda iştirakçıların sualları cavablandırılıb, mövzu ətrafında müzakirələr aparılıb.
Qeyd edək ki, bir ildən çoxdur davam edən təlimlərin ümumi saatı 150-ə çatıb. Təlimlər həm onlayn, həm də əyani formatda təşkil olunur. Bu günə qədər 3500-dən artıq tələbə bu proqramda iştirak edib. Təlimlər müxtəlif sahələr üzrə ixtisaslaşmış hüquqşünaslar, BDU-nun müəllimləri, hakimlər, Azərbaycan Respublikası Vəkillər Kollegiyasının üzvləri, mediatorlar, notariuslar, həmçinin dövlət orqanları və kommersiya təşkilatlarının hüquqşünasları tərəfindən keçirilir.
