BDU-da “Fərqli fərdlər” himninə çəkilən klipin təqdimatı
Bakı Dövlət Universitetində (BDU) “BDU könüllüləri” təşkilatının təşkilatçılığı ilə sağlamlıq imkanları məhdud uşaqlara həsr olunmuş “Fərqli fərdlər” himninə çəkilən klipin təqdimatı keçirilib. Klip Mədəniyyət Nazirliyinin dəstəyi, “Ümid var” İnklüziv Yaradıcılıq Birliyinin, “Uşaqların Xoşbəxt Gələcəyi” İctimai Birliyinin təşkilatçılığı, “PASHA Holding”in sponsorluğu ilə çəkilib.
Tədbirin moderatoru, nitq və jest dili üzrə təlimçi Nuranə Abıyeva tədbirin təşkilatçılığında göstərdiyi dəstəyə görə Universitetin rəhbərliyinə və “BDU könüllüləri” təşkilatına təşəkkürünü bildirib. Qeyd edib ki, inklüziv cəmiyyətin əsas qayəsini əlilliyi olan şəxslərin cəmiyyətin ayrılmaz bir parçası kimi gündəlik fəaliyyətlərə cəlb edilməsi və onların digər həmyaşıdlarına bənzər şəkildə resurs və imkanlara çıxışının təmin edilməsi təşkil edir.
BDU-nun Humanitar məsələlər və gənclər siyasəti şöbəsinin müdiri Ramin Səmədov vurğulayıb ki, bu gün ölkəmizdə sağlamlıq imkanları məhdud şəxslər üçün inklüziv təhsilin inkişafı üzrə dövlət proqramları icra edilir. BDU bu istiqaməti tədrisin və sosial həyatın təşkili prosesində öz strategiyasına əlavə edərək, uğurla icra edir: “Sağlamlıq imkanları məhdud şəxsləri bütün proseslərə cəlb etmək və inkişaflarını təmin etmək əsas məqsədlərimizdəndir. Çünki onlar əngəlli deyil, sadəcə fərqlidirlər”.
“Ümid var” İnklüziv Yaradıcılıq Birliyinin sədri Nazilə Məhərrəmova və autizm üzrə araşdırmaçı Əsmər Əskərova bu himnin inklüziv cəmiyyətə töhfə vermək məqsədi daşıdığını və universitetlərdə keçirilən belə tədbirlərin tələbə gənclərin bu tip məsələlərə həssaslığını artırdığını vurğulayıblar.
Tədbir əlilliyi olan uşaqların hazırladığı xüsusi konsert proqramı ilə davam edib.
Qeyd edək ki, himn Heydər Əliyev Fondunun dəstəyi, “Caspian Event Organisers” şirkətinin təşkilatçılığı ilə xüsusi qayğıya ehtiyacı olan insanlara həsr olunan “Fərqli fərdlər” beynəlxalq konqresinin təşəbbüsü və sponsorluğu, “Ümid var” İnklüziv Yaradıcılıq Birliyinin üzvlərinin iştirakı ilə hazırlanıb. Himnin musiqisi Tural Məmmədliyə, sözləri isə Leyla Quliyevaya məxsusdur. Klipin rejissoru isə Ülviyyə Könüldür.
