BDU və Dövlət Ehtiyatları Agentliyinin nümayəndələri arasında görüş
Bakı Dövlət Universitetinin (BDU) Karyera və məzunlarla iş Mərkəzi və Azərbaycan Respublikasının Dövlət Ehtiyatları Agentliyinin (ADEA) nümayəndələri arasında işgüzar görüş keçirilib. Görüşün məqsədi tələbə və məzunların əmək bazarına hazırlığının gücləndirilməsi, praktiki bacarıqlarının inkişaf etdirilməsi və dövlət sektorunda real iş mühiti ilə inteqrasiyasının dəstəklənməsi istiqamətində əməkdaşlıq imkanlarının müzakirəsi olub.
Görüşdə BDU-nun Karyera və məzunlarla iş Mərkəzinin əməkdaşları Mərkəzin fəaliyyəti, tələbə və məzunlara təqdim olunan xidmətlər, layihələr və gələcək inkişaf istiqamətləri barədə ətraflı məlumat verib. O, tələbə və məzunların peşəkar bacarıqlarının inkişafına yönəlmiş əməkdaşlıq perspektivlərini təqdim edərək strateji idarəetmə və logistika, mentorluq proqramları, böhran idarəetməsi, eləcə də rəqəmsallaşma sahələrində birgə fəaliyyət imkanlarını diqqətə çatdırıb.
Müzakirələr zamanı ADEA nümayəndələri təklif olunan əməkdaşlıq istiqamətlərini yüksək qiymətləndiriblər. ADEA mütəxəssislərinin iştirakı ilə ixtisaslaşmış ustad dərslərinin təşkili, tələbə və məzunların cəlb olunduğu tematik layihə qruplarının formalaşdırılması və birgə praktiki layihələrin həyata keçirilməsi imkanları geniş müzakirə olunub.
Tərəflər bu əməkdaşlığın tələbə və məzunların peşəkar inkişafına, dövlət sektorunda karyera imkanlarının genişlənməsinə mühüm töhfə verəcəyini vurğulayıblar.