BDU-nun Geologiya fakültəsinin tələbələri Faydalı qazıntılar muzeyində
Bakı Dövlət Universitetinin (BDU) Geologiya fakültəsi Tələbə Həmkarlar İttifaqı Komitəsi (THİK) ,“BDU könüllüləri” və Tələbə Elmi Cəmiyyətinin (TEC) təşəbbüsü ilə 27 mart – Azərbaycan Respublikasında “Elm günü”nə həsr olunmuş silsilə tədbirlər çərçivəsində I kurs tələbələrinin BDU-nun Faydalı qazıntılar muzeyinə maarifləndirici ekskursiyası təşkil olunub.
Ekskursiyanın məqsədi tələbələrin geologiya və mineralogiya sahəsində nəzəri biliklərini real nümunələr üzərində daha yaxşı mənimsəmələrinə şərait yaratmaq olub. Muzeyin bələdçisi tərəfindən iştirakçılara faydalı qazıntı yataqları, mineralların yaranma şəraiti, fiziki-kimyəvi xüsusiyyətləri və sənayedəki əhəmiyyəti barədə məlumat verilib.
Tələbələr müxtəlif filiz nümunələri, kristallar və geoloji eksponatlarla yaxından tanış olub, ölkənin mineral ehtiyatları və onların istismar perspektivləri haqqında məlumat əldə ediblər. İnteraktiv formatda keçirilən ekskursiya zamanı tələbələr suallar ünvanlayaraq mövzu ətrafında fikir mübadiləsi aparıblar.
Ekskursiya tələbələrin ixtisas üzrə biliklərinin artırılmasına və praktik dünyagörüşlərinin formalaşmasına töhfə verib.
