AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) “BSU Creativity Workz” komandası COP29 konfransı çərçivəsində keçirilən “Green Tech Karabakh” layihəsində uğurla iştirak edib. Komanda auditoriya qarşısında innovativ aqrotexniki həll olan "Irrigo" ağıllı suvarma sistemini təqdim edib.

Irrigo – ağıllı texnoloji həllərə əsaslanan yeni nəsil kənd təsərrüfatı modelidir. Bu modelin əsas məqsədi kənd təsərrüfatında suvarma suyu kimi istifadə olunan şirin su miqdarını minimuma endirmək, suvarma suyu olaraq istifadəyə yararsız olan suların üzvi çirkləndiricilərdən, duzlardan və ağır metallardan təmizlənməsini, suvarma suyu kimi istifadəsini və bu suyun sistemdə dövri hərəkətini təmin edən ekosistem yaratmaqdır. Layihə su ehtiyatlarına qənaət etməklə yanaşı, maddi və vaxt resurslarının optimallaşdırılmasını təmin edir. Sistemin uzaqdan idarəetmə imkanı və hava proqnozu ilə sinxronlaşdırılmış işləmə rejimi kimi müasir xüsusiyyətləri onu kənd təsərrüfatı sahəsində əvəzolunmaz bir həllə çevirir.

Təqdimat zamanı dünyanın müxtəlif ölkələrindən olan nümayəndələr "Irrigo" ağıllı suvarma sisteminin səmərəliliyini, xərcləri azaltma potensialını və ekosistemin qorunmasına olan müsbət təsirini yaxından öyrənmək imkanı əldə ediblər.

Tədbir iştirakçıları sistemin təqdim etdiyi innovativ həllərə böyük maraq göstəriblər.