AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Sosial elmlər və psixologiya fakültəsinin Pedaqogika kafedrasının təşkilatçılığı ilə fakültənin şəhid məzunu Əsəd Əsədovun xatirəsinə həsr olunmuş “Şəhidlərimizin vətənpərvərlik yolu” adlı tədbir keçirilib.

Əvvəlcə Dövlət himni səsləndirilib, torpaqlarımızın azadlığı uğrunda həlak olan şəhidlərimizin əziz xatirəsi bir dəqiqəlik sükutla yad edilib.

Daha sonra 44 günlük Vətən müharibəsindən və Sosial elmlər və psixologiya fakültəsinin şəhid məzunu Əsəd Əsədovun həyat yolundan bəhs edən təqdimat nümayiş etdirilib.

Fakültənin sosial məsələlər və tələbələrlə iş üzrə dekan müavini Nəzakət Kərimova şəhid məzun Əsəd Əsədovun timsalında torpaqlarımızın işğaldan azad edilməsi uğrunda canından keçən igid oğul və qızlarımızın xatirəsinin daim uca tutulmasının hər bir azərbaycanlının mənəvi borcu olduğunu deyib. O, şəhid ailələrinə yüksək diqqət və qayğı göstərildiyini, Sosial elmlər və psixologiya fakültəsində şəhid məzunların anım tədbirlərinin daim təşkil edildiyini, bunun gənc nəslin vətənpərvərlik ruhunda tərbiyə edilməsində əvəzsiz rol oynadığını qeyd edib.

Pedaqogika kafedrasının müdiri Ləzifə Qasımova, professor Nübar Muxtarova, dosent,  şəhid Aydın Manerovun həyat yoldaşı Gülarə Kərimova, şəhid Əsəd Əsədovun həyat yoldaşı Ülkər Əsəd şəhidin həyat yolundan, tələbəlik illərindən söz açıb, xatirələrini bölüşüblər.

Sonda şəhid məzunun xanımı Ülkər Əsəd həyat yoldaşının xatirəsinə həsr etdiyi şeirlər kitabını Pedaqogika kafedrasına bağışlayıb.