BDU-da “Qarabağ günü”

SOSİAL 14 Oktyabr 2024 17:45

Bakı Dövlət Universitetinin (BDU) Tarix fakültəsinin “İstiqlal” klubunun təşkilatçılığı ilə 44 günlük Vətən müharibəsinə həsr olunmuş “Qarabağ günü” adlı tədbir keçirilib.

Əvvəlcə Dövlət himni səsləndirilib, daha sonra Azərbaycanın ərazi bütövlüyü uğrunda həlak olan şəhidlərimizin əziz xatirəsi bir dəqiqəlik sükutla yad edilib.

BDU-nun Tarix fakültəsinin dekanı, professor İbrahim Zeynalov 2020-ci il sentyabrın 27-dən təcavüzkar Ermənistanın Azərbaycana qarşı növbəti təxribatlarının qarşısının alınması üçün Müzəffər Ali Baş Komandan İlham Əliyevin rəhbərliyi ilə Vətən müharibəsinin başlanıldığını, ərazi bütövlüyümüz uğrunda 44 günlük mübarizədə xalqımızın bir yumruq kimi həmrəylik, əzm və iradə nümayiş etdirdiyini, əsgər və zabitlərimizin qəhrəmanlıq salnaməsi yazaraq düşmən üzərində parlaq Qələbə qazandığını bildirib. Qeyd edib ki, dünya hərb tarixinə qızıl hərflərlə yazılan Vətən müharibəsi unudulmayan qürur səhifəsi, düşmənlərin yaddaşında isə əbədi məğlubiyyət kimi qalacaq.

lll kurs tələbələri Röya Mehdizadə Tarix fakültəsinin şəhid məzunları Elşən Salayev, Hüseyn Quliyev, Yüksəl Əlizadə, Fatimə Cavadlı şəhid qardaşı Nemət Cavadlı, l kurs tələbəsi Kamal Şalıyev şəhid qardaşı, BDU-nun Hüquq fakültəsinin məzunu Ceyhun Şalıyev haqqında məlumat verərək, xatirələrini bölüşüblər.

Sonra Tarix fakültəsinin tələbələri Gülyanaq Vəlizadə, Elvin İbrahimli, Sücəddin Muradov, Mehdi Rzayev, Lamiyə Kamallı, Ayan İsmayılova, Altay Hüseynzadə, Məhəmməd Həsənov, Gülarə Mehdizadə və Ləman Fətiyevanın ifasında bədii kompozisiya təqdim olunub.