AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Biologiya fakültəsinin Genetika kafedrasının doktorantı Nilufər Hacıyevanın “Yenidoğulmuşlarda qalaktozemiya xəstəliyinin diaqnostikası və Azərbaycanda yayılma tezliyi” mövzusunda elmi seminarı keçirilib. Fakültə rəhbərliyi və professor-müəllim heyətinin iştirak etdiyi seminar zamanı qalaktozemiya xəstəliyinin genetik səbəbləri və uşaqlarda bu xəstəliyin erkən aşkarlanmasına dair məsələlər müzakirə edilib.

Məruzəçi bildirib ki, bu tədqiqat çərçivəsində 576 yenidoğulmuş və 138 xəstə uşaq üzərində araşdırma aparılıb. Nəticədə qalaktozemiyanın yayılma faizinin 0,86% olduğu müəyyən edilib. Dünyada yayılmış əsas irsi xəstəliklərdən biri hesab olunan qalaktozemiya Ümumdünya Səhiyyə Təşkilatı tərəfindən erkən diaqnostika proqramlarına daxil edilib.

Seminarda vurğulanıb ki, erkən diaqnoz və düzgün müalicə qalaktozemiya xəstələrinin həyat keyfiyyətini xeyli yaxşılaşdırır. Xəstələrin və ailələrinin bu barədə məlumatlı olması və lazımi tədbirlər görməsi çox vacibdir. Tədqiqat yeni müalicə üsullarının inkişaf etdirilməsinə töhfə verməyi hədəfləyir.