BDU-da Özbəkistanın Jurnalistika və Kütləvi Kommunikasiya Universitetinin nümayəndə heyəti ilə görüş
Bakı Dövlət Universitetində (BDU) Özbəkistan Respublikasının Jurnalistika və Kütləvi Kommunikasiya Universitetinin nümayəndə heyəti ilə görüş keçirilib.
Görüşdə BDU-nun sosial məsələlər, tələbələrlə iş və ictimaiyyətlə əlaqələr üzrə prorektoru Əliş Ağamirzəyev, beynəlxalq əlaqələr şöbəsinin müdiri Rauf Həsənov, Jurnalistika fakültəsinin dekanı Vüqar Əliyev, Özbəkistan Jurnalistika və Kütləvi Kommunikasiya Universitetinin tədris işləri üzrə prorektoru Ravşan Rayimjanov və qeydiyyat ofisinin meneceri Axror Əhmədov iştirak ediblər.
Prorektor Əliş Ağamirzəyev qonaqlara BDU-nun tarixi, tədris sistemi və elmi-tədqiqat fəaliyyəti barədə məlumat verib. Qeyd olunub ki, BDU Özbəkistanın ali təhsil müəssisələri ilə əməkdaşlığını genişləndirir, tələbə və müəllim mübadiləsi proqramlarını uğurla həyata keçirir. Görüş zamanı əməkdaşlığın dərinləşdirilməsi, həmçinin Jurnalistika fakültəsinin magistratura pilləsi üzrə “Radiotelejurnalistika” və “İctimaiyyətlə əlaqələr” ixtisaslaşmaları çərçivəsində ikili diplom proqramlarının yaradılması imkanları müzakirə olunub.
Sonda nümayəndə heyəti BDU-nun Heydər Əliyev Muzeyi, Genetika və təkamül muzeyi, Faydalı qazıntılar muzeyi ilə tanış olub.
