BDU-da görkəmli ədəbiyyatşünas alim Pənah Xəlilovun 100 illik yubileyinə elmi sessiya həsr olunub
Bakı Dövlət Universitetinin (BDU) Filologiya fakültəsində görkəmli ədəbiyyatşünas alim, tənqidçi və tərcüməçi Pənah Xəlilovun 100 illik yubileyinə həsr olunmuş elmi sessiya keçirilib.
Türkologiya kafedrasının müdiri, professor Məhərrəm Məmmədov görkəmli alimin elmi-pedaqoji fəaliyyətindən və yaradıcılıq istiqamətlərindən söz açıb, əsərlərinin ədəbiyyatşünaslıq elminə mühüm töhfələr verdiyini diqqətə çatdırıb.
Türkologiya kafedrasının dosenti Kəmalə Nəcəfova, professor Firuzə Ağayeva, AMEA-nın Nizamı adına Ədəbiyyat İnstitutunun professoru Yaşar Qasımbəyli Pənah Xəlilovun elmi irsi haqqında məruzə ediblər. Məruzələrdə bildirilib ki, həyatını BDU-ya bağlamış tanınmış pedaqoq ömrünü gənc nəslin təlim-tərbiyəsinə sərf edib, fəal elmi-pedaqoji fəaliyyətinə görə dəfələrlə Universitet rəhbərliyi tərəfindən mükafatlandırılıb. Elm və təhsil sahəsindəki xidmətləri nəzərə alınaraq, 2001-ci ildə Pənah Xəlilova “Əməkdar müəllim” fəxri adı verilib. Çıxışlarda qeyd olunub ki, bir çox dərslik və dərs vəsaitlərinin müəllifi olmuş Pənah Xəlilovun iki cildlik “SSRİ xalqları ədəbiyyatı”, professor Mir Cəlal Paşayevlə birlikdə yazdığı “Ədəbiyyatşünaslığın əsasları”, 1994-cü ildə nəşr olunmuş “Türk xalqlarının və şərqi slavyanların ədəbiyyatı” kitabları bu gün də alim və tələbələrin müraciət etdiyi dəyərli elmi mənbələrdir. 20-dən çox kitabın, 300-dən artıq məqalənin müəllifi olan Pənah Xəlilov həm də bədii tərcümə sahəsində ciddi xidmətləri olan yaradıcı şəxsiyyətlərdəndir. Migel de Servantesin “Don Kixot” və Herodotun “Tarix” əsərlərinin tərcüməsi görkəmli alimin yaradıcılığında xüsusi yer tutur.
Daha sonra çıxış edən Dünya ədəbiyyatı kafedrasının müdiri, professor Cəlil Nağıyev, dosentlər Nüşabə Sadıxlı, Kəmalə İslamzadə və Sultan Seyidova Pənah Xəlilovun elm və təhsil sahəsindəki mühüm xidmətlərindən, alim və müəllim kimi şəxsi keyfiyyətlərindən danışıb, onunla bağlı xatirələrini bölüşüblər.
