BDU-da görkəmli alim və pedaqoq Əhməd Abdinovun 80 illik yubileyi qeyd olunub
Bakı Dövlət Universitetinin (BDU) Fiziki elektronika kafedrasının müdiri, fizika-riyaziyyat elmləri doktoru, professor Əhməd Abdinovun 80 illik yubileyinə həsr olunmuş konfrans keçirilib.
Əvvəlcə professor Əhməd Abdinovun həyat və fəaliyyətinə həsr olunmuş videoçarx nümayiş olunub.
Mərasimdə çıxış edən BDU rektoru Elçin Babayev Əhməd Abdinovun görkəmli alim, peşəkar pedaqoq və elm təşkilatçısı olduğunu bildirib. O qeyd edib ki, professor Əhməd Abdinov 80 illik həyatının 63 ilini BDU-ya bağlayıb. BDU-nun Fizika fakültəsinin məzunu olan görkəmli alim 1972-ci ildə namizədlik, 1978-ci ildə doktorluq dissertasiyası müdafiə edib. 1971-ci ildən BDU-nun Fizika fakültəsində assistent, baş müəllim, dosent, professor, dekan kimi fəaliyyət göstərib, 1992-ci ildən kafedra müdiri vəzifəsində çalışır. Ümummilli Lider Heydər Əliyevin Sərəncamı ilə 1993-cü ilin dekabrında Azərbaycan Respublikası təhsil nazirinin müavini təyin edilən Əhməd Abdinov 2000-ci ilə kimi bu məsul vəzifədə çalışıb, bir müddət isə təhsil nazirinin əvəzi olub.
Rektor diqqətə çatdırıb ki, professor Əhməd Abdinov hələ sovet dövründə “Lenin təqaüdü”, “Respublika Lenin Komsomolu Mükafatı” kimi mükafatlara layiq görülüb, fizikanın müxtəlif aktual sahələrinə dair mühüm elmi yeniliklərə imza atıb. Görkəmli alim 650-dək elmi əsərin, ali məktəblər üçün yazılmış beş dərslik və 21 fənn proqramının müəllifidir. Onun elmi rəhbərliyi ilə 7 elmlər doktoru, 31 elmlər namizədi, 14 magistr dissertasiyası müdafiə edilib.
Rektor uzunmüddətli səmərəli elmi və pedaqoji fəaliyyətinə görə Əhməd Abdinova BDU-nun Fəxri Fərmanını təqdim edib.
BDU-nun Fizika fakültəsinin dekanı Bəxtiyar Paşayev “Professor Əhməd Abdinovun həyatı və elmi pedaqoji” fəaliyyəti mövzusunda məruzə edib.
Bakı Ali Neft Məktəbinin rektoru Elmar Qasımov Əhməd Abdinovun Azərbaycan elminə və təhsilinə verdiyi mühüm töhfələri qeyd edib, onun ölkədə ali təhsilin formalaşmasındakı xidmətlərini sadalayıb. O qeyd edib ki, professor Əhməd Abdinov görkəmli alim, pedaqoq olmaqla yanaşı, güclü təşkilatçı, gözəl ailə başçısı və prinsipial bir insandır: “BDU-nun gücü də məhz Əhməd Abdinov kimi nəhəng alimlərdədir. Onun həyatı və fəaliyyəti minlərlə tələbəsi üçün nümunədir”.
Bakı Mühəndislik Universitetinin rektoru Yaqub Piriyev, Azərbaycan Dövlət Pedaqoji Universitetinin rektoru Cəfər Cəfərovun adından təbrik mətnləri, Türkiyənin Bilkent Universitetinin professoru Əmrulla Məmmədovun videotəbriki səsləndirilib.
AMEA-nın akademik-katibi, Elm və Təhsil Nazirliyinin Fizika İnstitutunun baş direktoru Arif Həşimov, Nəsirəddin Tusi adına Şamaxı Astrofizika Rəsədxanasının baş direktoru Namiq Cəlilov, Fizika İnstitutunun Bərk cisim elektronikası laboratoriyasının rəhbəri Cavad Abdinov, Radiasiya Problemləri İnstitutunun icraçı direktoru Rəvan Mehdiyeva, Fizika fakültəsinin kafedra müdiri Səcidə Abdulvahabova, Nanomaterialların kimyəvi fizikası kafedrasının müdiri Maarif Cəfərov, Fizika fakültəsinin professoru Tərlan Hüseynov, Ordubad Tusi Xeyriyyə Cəmiyyətinin İdarə Heyətinin sədri Yəhya Babanlı, görkəmli alimin oğlu, tibb elmləri doktoru Elçin Abdinov, nəvəsi Leyla Abdinova çıxışlarında Əhməd Abdinovun məhsuldar elmi yaradıcılığından bəhs edib, onun tədqiqatlarının əhəmiyyətini vurğulayıblar.
Sonda söz yubilyara verilib. Əhməd Abdinov çıxışında yubiley tədbirinin təşkilinə görə BDU rəhbərliyinə təşəkkür edib, hər bir yubileyin insanın özü, ailəsi, işlədiyi kollektivi, Vətəni qarşısında bir hesabat olduğunu bildirib, gəncləri əməksevər olmağa səsləyib.
