BDU-da “FUTURE17 SDG Challenge” proqramının iştirakçıları ilə ilk görüş
Bakı Dövlət Universitetində (BDU) “FUTURE17 SDG Challenge” proqramı çərçivəsində seçilmiş tələbələrlə ilk görüş keçirilib.
Görüşdə BDU rektorunun keyfiyyət təminatı üzrə müşaviri Asiman İlyasov, layihə iştirakçıları və proqramın digər nümayəndələri iştirak ediblər.
Tədbirdə çıxış edən Asiman İlyasov tələbələrin təşəbbüskarlıq potensialının inkişaf etdirilməsinin, qlobal çağırışlara cavab verən həllər və layihələr hazırlaması üçün əlverişli imkanların yaradılmasının əhəmiyyətini vurğulayıb.
Qeyd olunub ki, bu kimi beynəlxalq təşəbbüslər tələbələrin akademik biliklərini praktiki fəaliyyətlə əlaqələndirmələrinə, real sosial və ekoloji problemlərin həllinə yönəlmiş layihələr üzərində işləmələrinə, eləcə də komanda işi, layihələrin idarə edilməsi kimi mühüm bacarıqlarının inkişafına şərait yaradır.
Görüş zamanı proqramın həyata keçirilmə mərhələləri, iştirakçıların qarşısında duran vəzifələr və layihə ideyalarının inkişaf etdirilməsi ilə bağlı məsələlər ətrafında fikir mübadiləsi aparılıb. Tələbələrin ideyaları dinlənilib, layihələrin hazırlanması və inkişaf etdirilməsi ilə bağlı sualları cavablandırılıb.
Qeyd edək ki, “FUTURE17 SDG Challenge” layihəsi dünyanın aparıcı ali təhsil və reytinq təşkilatlarından biri olan QS və Böyük Britaniyanın Ekseter Universitetinin birgə təşəbbüsü ilə həyata keçirilir. BDU layihənin tərəfdaşları sırasında yer alır. Layihənin əsas məqsədi gənclərin Birləşmiş Millətlər Təşkilatının Dayanıqlı İnkişaf Məqsədləri ilə əlaqəli innovativ ideya və layihələrinin inkişafına dəstək vermək, sosial və ekoloji problemlərin həllinə yönəlmiş təşəbbüslərin reallaşdırılması üçün imkanlar yaratmaqdır.
Proqram çərçivəsində iştirakçıların innovativ və yaradıcı düşüncə, komanda işi, layihələrin idarə edilməsi və problemlərin həllinə yönəlmiş yanaşma bacarıqlarının inkişaf etdirilməsi, ideyalarını konkret layihələrə çevirmələrinə dəstək göstərilməsi nəzərdə tutulur.
