AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Tədqiqat, İnkişaf və İnnovasiyalar üzrə Mükəmməllik Mərkəzinin Nanoaraşdırmalar elmi-tədqiqat laboratoriyasının əməkdaşları Mustafa Muradov, Qönçə Eyvazova, Sevinc Məmmədyarova və Nanomaterialların kimyəvi fizikası kafedrasının I kurs doktorantı Məhəmməd Bağır Bağırovun “Buxar fazalı sulfidləşmə prosesi ilə anizotrop AgNWs/PVA/Ag2S nanokompozitlərinin hazırlanması” (“Preparation of anisotropic AgNWs/PVA/Ag₂S nanocomposites via a vapor-phase sulfidation process”) adlı məqaləsi Q2 kvartillı “RSC Advances” (IF:3.9) jurnalında dərc olunub.

https://doi.org/10.1039/D4RA01585A

İşdə AgNWs/PVA-nın səthinin H₂S qazının təsirinə məruz qoyulması ilə AgNWs/PVA/Ag₂S anizotrop nanokompozitləri hazırlanıb. H₂S qazının təsiri ilə nümunələrin struktur, morfoloji və optik xassələrində baş verən dəyişikliklər tədqiq edilib. Nanokompozitlərin struktur xassələri rentgen şüalarının difraksiyası (XRD), optik xassələri ultrabənövşəyi-görünən spektrometriya (UV-Vis), səth morfologiyası isə transmision elektron mikroskopiyası (TEM) əsasında öyrənilib. Struktur tədqiqatlarından alınmış nəticələrin təhlili əsasında Ag₂S nanohissəciklərinin formalaşması səbəbinin polimer matrisdə paylanmış AgNWs-in bir istiqamətdə sulfidləşməyə məruz qalması ilə əlaqədar olduğu müəyyən edilib. TEM nəticələri göstərib ki, H₂S qazının təsir etdiyi istiqamətdə gümüş nanonaqilləri parçalanıb və Ag₂S nanoklasterləri əmələ gətirib.  Kompozitin hava ilə təmasda olan tərəfində isə AgNWs öz strukturunu saxlayıb.