Qırğız Milli Universitetinin rektoru BDU-da mühazirə deyib
Bakı Dövlət Universitetində (BDU) Qırğızıstanın Yusif Balasaqunlu adına Qırğız Milli Universitetinin rektoru Dogdurbek Çontoyev tələbələrə mühazirə deyib.
BDU-nun Ekoloji kimya kafedrasının müdiri, professor Sevinc Hacıyeva hazırda Universitetdə ətraf mühitin mühafizəsi, iqlim dəyişmələri, su ehtiyatlarının idarə olunması və davamlı inkişaf istiqamətində həyata keçirilən tədris proqramları və elmi-tədqiqat işləri barədə ətraflı məlumat verib. Bildirib ki, BDU-da ekoloji problemlərin kompleks şəkildə araşdırılması, regionun çağırışlarına uyğun mütəxəssis hazırlığı və beynəlxalq əməkdaşlığın genişləndirilməsi əsas prioritet istiqamətlərdəndir.
Daha sonra Qırğız Milli Universitetinin rektoru, coğrafiya elmləri doktoru, professor Dogdurbek Çontoyev “Mərkəzi Asiyada dövlətlərarası su bölgüsü problemləri və onların həlli yolları” mövzusunda mühazirə deyib. Rektor öncə rəhbərlik etdiyi universitet haqqında məlumat verərək, ali təhsil müəssisəsinin elmi potensialı, fakültələri və beynəlxalq əlaqələri barədə danışıb. O, Qırğız Milli Universiteti ilə BDU arasında oxşar fakültə və ixtisasların mövcud olduğunu vurğulayaraq, ekologiya, coğrafiya, hidrometeorologiya və ətraf mühitin idarə olunması sahələrində mümkün əməkdaşlıq imkanlarından söz açıb.
Məruzədə Mərkəzi Asiyada dövlətlərarası su bölgüsü məsələlərinin tarixi, hüquqi və geosiyasi aspektləri təhlil edilib, region ölkələri arasında transsərhəd su ehtiyatlarının bölüşdürülməsi zamanı yaranan problemlər və onların sosial-iqtisadi təsirləri izah olunub. Qeyd edilib ki, iqlim dəyişmələri, buzlaqların əriməsi, yağıntı rejiminin dəyişməsi və suya artan tələbat mövcud hidrometeoroloji problemləri daha da kəskinləşdirir. Bu baxımdan, su ehtiyatlarının səmərəli idarəolunması, birgə monitorinq mexanizmlərinin yaradılması və məlumat mübadiləsinin gücləndirilməsi xüsusi əhəmiyyət daşıyır. Professor həmçinin Mərkəzi Asiya və Xəzər regionunda ətraf mühitin mövcud vəziyyəti, hidrometeoroloji müşahidə sistemlərinin təkmilləşdirilməsi, elmi araşdırmaların dərinləşdirilməsi və institusional əlaqələrin möhkəmləndirilməsi yolları barədə fikirlərini bölüşüb.
Mühazirənin sonunda tələbə və müəllimlərin mövzu ətrafında sualları cavablandırılıb, müzakirələr aparılıb.
