BDU və Daşkənd Kimya Beynəlxalq Universiteti arasında anlaşma memorandumu imzalanıb
Bakı Dövlət Universiteti (BDU) ilə Özbəkistan Respublikasının Daşkənd Kimya Beynəlxalq Universiteti arasında əməkdaşlığa dair anlaşma memorandumu imzalanıb.
Sənədi BDU-nun rektoru Elçin Babayev və Daşkənd Kimya Beynəlxalq Universitetinin rektoru Akmal Allkuliev imzalayıblar.
Memorandum hər iki universitetin nəzdində fəaliyyət göstərən fakültə, institut və kolleclərdə təlim-tədris prosesinin təkmilləşdirilməsi və beynəlxalq standartlara uyğunlaşdırılması məqsədilə birgə layihələrin həyata keçirilməsini nəzərdə tutur. Bu çərçivədə konfrans, sərgi, seminar, simpoziumların təşkili, qısamüddətli kurs və təlimlərin keçirilməsi, eləcə də ortaq elmi-tədqiqat işlərinin aparılması planlaşdırılır.
Sənəddə, həmçinin elmi jurnallarda birgə nəşrlərin hazırlanması, ortaq akademik proqramların, tədris planlarının və sillabusların işlənib hazırlanması, təlimlərin təşkili, akademik və inzibati heyətin, tələbələrin, magistrantların, doktorantların və tədqiqatçıların qarşılıqlı mübadiləsi kimi məsələlər əksini tapıb.
Qeyd edək ki, əsası 2018-ci ildə qoyulmuş Daşkənd Kimya Beynəlxalq Universiteti Özbəkistanın nüfuzlu ali təhsil müəssisələrindən biridir.