AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universiteti (BDU) və "ARB24" telekanalı arasında imzalanmış əməkdaşlıq müqaviləsi çərçivəsində dördüncü "NewsLab" təlim proqramı başlayıb.

Üç ay davam edəcək proqram xəbər hazırlanması, nitq mədəniyyəti, görüntü və videomontaj sahələrini əhatə edir. Seçim mərhələsini uğurla tamamlayan 12 tələbə ilə BDU-da görüş keçirilib.

BDU-nun Jurnalistika fakültəsinin dekanı Vüqar Zifəroğlu bildirib ki, bu ildən etibarən təlimlərə III kurs tələbələri də cəlb edilib və əməkdaşlıq daha da genişləndirilib.

"ARB24" telekanalının direktoru Radik İsmayılov proqramın 4 ildir  uğurla icra olunduğunu diqqətə çatdırıb. O, bu təlimin jurnalistika sahəsində işə qəbul öhdəliyi ilə həyata keçirilən yeganə layihə olduğunu bildirib.

Proqramı "gənclər üçün dəyərli imkan" adlandıran professor Qulu Məhərrəmli iştirakçıları fəal olmağa və bu fürsətdən maksimum yararlanmağa çağırıb.

Daha sonra  Radik İsmayılov tələbələrə ilk təlim dərsini təqdim edib.

Qeyd edək ki, tədris proqramını uğurla başa vuran şəxslərə sertifikatlar veriləcək. Onların yarısı "ARB 24"də işlə təmin olunacaq.