BDU tələbələri üçün Bakı Zooloji Parkında innovativ dərslər təşkil olunub
Bakı Dövlət Universitetinin (BDU) Ekologiya və torpaqşünaslıq fakültəsinin Bioekologiya kafedrasının müəllimi, Bakı Zooloji Parkının direktoru Nəzakət İsayeva dərslərini innovativ metodlarla təşkil edib. O, “Ekologiya” ixtisası üzrə II kurs tələbələrinə tədris etdiyi “Heyvan ekologiyası” fənninin mühazirə və laboratoriya dərslərini Bakı Zooloji Parkı ərazisində keçib.
Parkın lektoriyasında keçirilən mühazirələrlə yanaşı, tələbələr laborator məşğələlər zamanı sürünənlər və həşəratlar sinfinə aid müxtəlif heyvan növlərini əyani şəkildə müşahidə ediblər. Onlar həm Azərbaycanın, həm də digər ölkələrin fauna nümunələri ilə yaxından tanış olub, Parkın klinikasında baytar həkiminin müşayiəti ilə heyvanlara ilkin tibbi yardımın göstərilməsi qaydalarını öyrəniblər.
Tədris prosesi çərçivəsində tələbələr zoopark ərazisində bələdçi ilə ekskursiyada iştirak edərək müxtəlif və unikal fauna nümunələri ilə tanış olublar. Eyni zamanda, onlar Azərbaycanın “Qırmızı kitab”ına daxil edilmiş, nəsli kəsilməkdə olan növlərin mühafizəsi və reintroduksiya proqramları barədə ətraflı məlumat əldə ediblər.
