BDU-nun rektoru Elçin Babayev Vyanada Azərbaycan Mədəniyyət Mərkəzinin rəhbəri Leyla Qasımova ilə görüşüb
Bakı Dövlət Universitetinin (BDU) rektoru Elçin Babayev Avstriyanın paytaxtı Vyana şəhərində Azərbaycan Respublikasının Avstriyadakı səfirliyinin nəzdində fəaliyyət göstərən Azərbaycan Mədəniyyət Mərkəzinin rəhbəri Leyla Qasımova ilə görüşüb.
Görüş zamanı tərəflər Azərbaycan və Avstriya arasında akademik və mədəni əlaqələrin inkişafı, elm və təhsil sahəsində əməkdaşlıq perspektivləri, eləcə də mədəni irsin təbliği istiqamətində birgə təşəbbüslər barədə müzakirə aparıblar.
Elçin Babayev BDU-nun beynəlxalq əlaqələrinin genişləndirilməsinə xüsusi önəm verdiyini vurğulayaraq, Universitetin dünyanın aparıcı elm və təhsil müəssisələri ilə əməkdaşlığının daha da gücləndirilməsinin vacibliyini qeyd edib. O, BDU-nun tələbə və müəllimlərinin beynəlxalq mübadilə proqramlarında iştirakının artırılmasının, habelə Universitetin nüfuzlu akademik şəbəkələrə daha sıx inteqrasiyasının əhəmiyyətini vurğulayıb.
Leyla Qasımova Azərbaycan Mədəniyyət Mərkəzinin fəaliyyəti, eləcə də mədəniyyətimizin Avstriyada tanıdılması istiqamətində həyata keçirilən layihələr barədə məlumat verib. O, BDU ilə Avstriya ali təhsil və tədqiqat institutları arasında akademik və mədəni əməkdaşlıq təşəbbüslərinə dəstək verməyə hazır olduqlarını qeyd edib.
Sonda tərəflər gələcək əməkdaşlığın konkret istiqamətlərini müəyyənləşdirərək, bu sahədə yeni layihələrin həyata keçirilməsi üçün səylərin davam etdiriləcəyini bildiriblər.