BDU əməkdaşları THE-nin “Qlobal Davamlı İnkişaf Konqresi”ndə iştirak edirlər
Tailandın paytaxtı Banqkok şəhərində dünyanın ən nüfuzlu reytinq təşkilatlarından biri hesab olunan “Times Higher Education” (THE) agentliyinin təşkilatçılığı ilə “Qlobal Davamlı İnkişaf Konqresi” keçirilir.
Bakı Dövlət Universitetinin (BDU) əməkdaşları - rektorun keyfiyyət təminatı üzrə müşaviri Asiman İlyasov, rəqəmsallaşma və informasiya texnologiyaları üzrə müşaviri Şəbnəm Səfərova, Beynəlxalq əlaqələr şöbəsinin müdiri Rauf Həsənov və Protokol sektorunun müdiri Cahan Qənizadə Konqresdə BDU-nu təmsil edirlər.
Nüfuzlu ali təhsil müəssisələrinin iştirak etdiyi Konqresdə Bakı Dövlət Universiteti Azərbaycan pavilyonunda təmsil olunur. Məlumat üçün bildirək ki, 3 gün davam edəcək Konqresdə 3000-dən çox nümayəndənin və 350-dən artıq məruzəçinin iştirak etməsi planlaşdırılır.
Konqresdə nümayəndələr üçün eksklüziv olaraq canlı sual-cavab sessiyasının müşayiəti ilə universitetləri Dayanıqlı İnkişaf Məqsədləri üzrə qiymətləndirən yeganə qlobal reytinq cədvəli “THE Impact Rankings 2024”ün nəticələri də təqdim olunacaq.
