BDU-da “44 günlük Vətən müharibəsi Böyük Britaniya mətbuatında” mövzusunda elmi seminar
Bakı Dövlət Universitetinin(BDU) Tarix fakültəsində “44 günlük Vətən müharibəsi Böyük Britaniya mətbuatında” mövzusunda elmi seminar keçirilib.
Fakültənin elmi işlər üzrə dekan müavini Kəmalə Nəcəfova bildirib ki, tədqiqatın məqsədi Vətən müharibəsinin Britaniya mətbuatında təqdim olunma xüsusiyyətlərini, istifadə olunan informasiya narrativlərini və Azərbaycanın mövqeyinin hansı kontekstdə təqdim edildiyini təhlil etməkdir.
BDU-nun Avropa və Amerika ölkələrinin yeni və müasir tarixi kafedrasının doktorantı Səbuhi Quliyev mövzu üzrə məruzə edib. Məruzəçi müharibə dövründə Böyük Britaniyanın aparıcı media qurumları – “BBC News”, “Reuters”, “The Guardian”, “The Independent” və “The Telegraph” kimi informasiya mənbələrinin yayımladıqları materialların təhlil edildiyini bildirib.
Məruzəçi bildirib ki, Ermənistanın hərbi təxribatından sonra Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin rəhbərliyi ilə Ordumuzun 44 gün uğurla davam edən əks-hücum əməliyyatları düşməni darmadağın etməklə yanaşı, bir çox nəticə və parametrlər üzrə dünya hərb tarixində yeni rekordlara imza atdı. Məruzəçi qeyd edib ki, Böyük Britaniya Azərbaycanın beynəlxalq səviyyədə tanınmış sərhədlərinin qorunmasını dəstəkləyən dövlətlərdən biri hesab olunur. Vətən müharibəsi başlayanda Böyük Britaniya hökuməti regiondakı gərginliyin artmasından narahatlığını ifadə edərək, tərəfləri hərbi əməliyyatları dayandırmağa və münaqişənin beynəlxalq hüququn prinsipləri çərçivəsində, xüsusilə də dövlətlərin suverenliyi və ərazi bütövlüyü prinsiplərinə hörmət əsasında həllinə çağırıb. Azərbaycanın ərazi bütövlüyünü rəsmi şəkildə dəstəkləyən Böyük Britaniya hökuməti 44 günlük müharibə zamanı bu mövqeyini parlament debatları, rəsmi bəyanatlar və hökumət təmsilçilərinin çıxışları vasitəsilə ifadə edib. Tədqiqat çərçivəsində xüsusilə “BBC News” və “Reuters” kimi qlobal media qurumlarının yayımladığı materiallar diqqətlə araşdırılıb. Bu media qurumları beynəlxalq informasiya məkanında böyük nüfuza malik olduqları üçün onların yayımladığı xəbərlər beynəlxalq ictimai rəyin formalaşmasına əhəmiyyətli təsir göstərir. Aparılan təhlil nəticəsində müəyyən edilmişdir ki, bəzi hallarda münaqişə ilə bağlı məlumatların təqdim edilməsində balanslı yanaşma müşahidə olunsa da, müəyyən materiallarda hadisələrin təqdim olunması tam obyektiv xarakter daşımayıb. Məsələn, müharibənin ilk günlərində bəzi media qurumları tərəfindən Azərbaycan tərəfi ilə bağlı irəli sürülən iddialar kifayət qədər dəqiq mənbələrə əsaslanmadan yayımlanıb. Britaniya mətbuatında münaqişənin işıqlandırılması zamanı fərqli narrativlərin mövcudluğu da diqqət çəkir. Bəzi qəzetlər hadisələri əsasən humanitar prizma ilə təqdim edib, mülki əhalinin vəziyyəti, şəhərlərin dağıdılması və müharibənin sosial nəticələri kimi məsələlərə xüsusi diqqət ayırıb.
Aparılan təhlil göstərir ki, Britaniya mediasında İkinci Qarabağ müharibəsinin təqdim olunması müxtəlif yanaşmaların paralel şəkildə mövcudluğu ilə xarakterizə olunur. Bir tərəfdən, münaqişənin beynəlxalq hüquqi əsasları və Azərbaycanın mövqeyi bəzi materiallarda aydın şəkildə ifadə olunub. Digər tərəfdən isə, bəzi xəbərlərdə hadisələr daha çox siyasi və humanitar çərçivədə təqdim edilib, münaqişənin tarixi və hüquqi konteksti kifayət qədər geniş izah olunmayıb.
Seminarın sonunda iştirakçıların sualları cavablandırılıb.
