Azərbaycanda ilk “TələbəPlus” kartları BDU tələbələrinə təqdim edildi
Bakı Dövlət Universitetində (BDU) “TələbəPlus” kartlarınun təqdimetmə mərasimi keçirilib. “Tələbə Plus” kartları ilk dəfə olaraq BDU-nun 14 tələbəsinə təqdim olunub.
Mərasimdə çıxış edən BDU-nun rektoru Elçin Babayev qeyd edib ki, Təhsilin İnkişafı Fondunun (TİF) reallaşdırdığı bu layihə gənclərin təhsil həyatında önəmli rol oynayacaq: “Təhsilin İnkişafı Fondu yarandığı gündən tələbəyönümlü müxtəlif layihələr həyata keçirir. “TələbəPlus” kartlarının verilməsi də bu uğurlu layihələrdən biridiir. Ali təhsil müəssisələri yaradılan imkandan kifayət qədər bəhrələnəcək. Bu kartlar tələbələrə ən müxtəlif istiqamətlərdə geniş imtiyazlar təqdim edəcək. Tələbələr təhsil, səhiyyə, mədəniyyət, nəqliyyat və digər xidmətlərlə bağlı endirimlərdən faydalana biləcəklər”. Rektor “TələbəPlus” kartlarının ilk dəfə olaraq BDU tələbələrinə verilməsinin simvolik mənası olduğunu diqqətə çatdırıb. BDU ölkənin ən böyük və qədim ali təhsil müəssisəsi kimi ən çox tələbə kontingentinə malikdir. BDU müstəqil Azərbaycan dövlətinin qurucusu, Ümummilli Lider Heydər Əliyevin məzunu olduğu ali məktəbdir.
TİF-in İdarə Heyətinin sədri Elnur Nəsibov “TələbəPlus” kartlarının ilk istifadəçiləri olan BDU tələbələrini təbrik edib. O bildirib ki, bir ildən artıq üzərində çalışdıqları layihə artıq reallaşıb: “BDU tələbələri “TələbəPlus” kartlarının ilk istifadəçiləri olacaqlar. Təhsilin İnkişafı Fondu daim dövlət-özəl tərəfdaşlığı, universitet-sənaye işbirliyinə xüsusi önəm verib. Təhsil sahəsində aparılan islahatlar ölkədə ali təhsilə əlçatanlığı ən yüksək səviyyəyə çatdırıb. Bu il ilk dəfə ali təhsil alanların sayı 250 min nəfər olub. Bunu nəzərə alaraq, 250 min tələbə üçün tələbə kartları gətiriləcək. Növbəti mərhələdə bu, peşə və orta ixtisas təhsilinə də şamil ediləcək. Növbəti tədris ilində isə təhsil sahəsində çalışan əməkdaşlar da layihədən yararlana biləcəklər”.
Fondun İdarə Heyətinin sədri diqqətə çatdırıb ki, indiyədək 200-dən artıq şirkətdə - pərakəndə satış, geyim, yemək, qida sahələri üzrə tələbələrin ən çox müraciət etdikləri yerlərdə güzəşt və imtiyazların, endirimlərin edilməsinə nail olunub. Mədəniyyət Nazirliyi ilə imzalanan müqaviləyə əsasən, mədəniyyət obyektləri, muzeylər, sərgi salonlarından istifadədə də güzəştlər olacaq. Gələcəkdə idman, səhiyyə, nəqliyyat sahələrində də xidmətlər “TələbəPlus”a qoşulacaq.
“Kapital Bank”ın Korporativ satışlar departamentinin direktoru Qara Əbdülrəhmanov, ”Visa”nın Azərbaycan üzrə ölkə meneceri Nurlan Hacıyev, “Tələbə Plus” kartına layiq görülən “Hüquqşünaslıq” ixtisası üzrə I kurs tələbəsi Məhəmməd Qasımov çıxışlarında kartın üstünlükləri və tələbələrə maksimum imkanlar yaradacağını qeyd ediblər.
Tədbirin sonunda qəbul imtahanlarında ən yüksək bal toplayaraq BDU-ya qəbul olan 14 nəfər I kurs tələbəsinə “TələbəPlus” kartı təqdim olunub.
