AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Qazaxıstanın Ş.Yessenov adına Xəzər Texnologiya və Mühəndislik Universitetinin tədris işləri üzrə prorektoru Kayırbek Makulovun rəhbərlik etdiyi nümayəndə heyəti Bakı Dövlət Universitetində olub.

Qonaqları salamlayan rektor Elçin Babayev hər iki qardaş xalqın ortaq tarixə, kökə malik olduğunu bildirib. Qeyd edib ki, ölkələrimiz arasında mövcud olan dostluq münasibətləri elm, təhsil sahəsində də hərtərfli əməkdaşlığa imkan yaradıb. BDU Qazaxıstan universitetləri ilə məhsuldar əməkdaşlığa malikdir. BDU-nun 12 ikili diplom proqramından 4-ü Qazaxıstan universitetləri ilə həyata keçirilir. Onların sırasında 2022-ci ildə BDU ilə Ş.Yessenov adına Xəzər Dövlət Texnologiyalar və Mühəndislik Universiteti arasında "Beynəlxalq münasibətlər" ixtisası üzrə imzalanan bakalavriat səviyyəsində birgə ikili diplom proqramı özünəməxsus yer tutur.

Elçin Babayev bildirib ki, BDU hüquq, beynəlxalq münasibətlər, şərqşünaslıq, riyaziyyat, fizika, kimya, biologiya, filologiya üzrə güclü məktəblərə malikdir. Ş.Yessenov adına Xəzər Dövlət Texnologiyalar və Mühəndislik Universiteti  ilə bu istiqamətlərdə, eləcə də humanitar sahələr üzrə əməkdaşlıq edilə, birgə elmi tədqiqatlar həyata keçirilə, ikili diplom proqramlarının sayı artırıla bilər.

Ş.Yessenov adına Xəzər Texnologiya və Mühəndislik Universitetinin tədris işləri üzrə prorektoru Kayırbek Makulov Azərbaycanın ən böyük ali məktəbi olan BDU ilə elmin müxtəlif sahələri üzrə əməkdaşlığı daha da gücləndirməkdə maraqlı olduqlarını diqqətə çatdırıb.