Ötən il BDU beynəlxalq əməkdaşlığı genişləndirib
2022-ci ildə Bakı Dövlət Universiteti (BDU) dünyanın 15-dən çox ölkəsinin 30-dək nüfuzlu ali təhsil müəssisəsi və təşkilatı ilə əməkdaşlığa dair müvafiq sənədlər imzalayıb.
Bu sənədlərdən 5-i “Erasmus+” beynəlxalq tələbə-müəllim mübadilə proqramı çərçivəsində əməkdaşlığı nəzərdə tutur. BDU ötən il Türkiyə, Qazaxıstan və Özbəkistan universitetləri ilə daha çox müqavilə imzalayıb. Ötən il BDU-da İslam Dünyası Təhsil, Elm və Mədəniyyət Təşkilatının (ICESCO) Azərbaycanda ilk ixtisaslaşdırılmış Biotibbi materiallar kafedrası yaradılıb. Bu, BDU ilə ISESCO arasında imzalanmış müqaviləyə əsasən həyata keçirilib.
Həmçinin Erasmus+ Jean Monnet proqramı üzrə Avropa Təhsil və Mədəniyyət üzrə İcraçı Agentliyinin (EACEA) elan etdiyi müsabiqənin qalibi olan “Green oriented studies in EU” (Avropa Birliyində “Yaşıl araşdırmalar”) layihəsinin icrası ilə bağlı qrant müqaviləsi imzalanıb.