Media nümayəndələri BDU-nun həyətində Yupiterin Yerə yaxınlaşmasını izləyiblər
Günəş sisteminin ən böyük planeti olan Yupiter sentyabrın 26-da Bakı vaxtı ilə saat 23:10-da Yer və Günəşlə bir düz xətt üzərində və həmin an özünün orbitində Günəşə ən yaxın nöqtədə - perihelidə olub.
Təbiət hadisəsi Bakı Dövlət Universitetinin (BDU) Tələbə Elmi Texniki-Yaradıcılıq Mərkəzinin həyətindəki teleskop vasitəsilə canlı yayımlanıb. Universitet rəhbərliyi, müəllimlər, tələbələr, ictimaiyyət və media nümayəndələri prosesi izləyiblər.
Səma cisimlərinin belə yerləşməsi təxminən 12 ildən bir baş verir və bu hadisə elmdə “Yupiterin böyük qarşıdurması” adlanır.
“Böyük qarşıdurma”nın əsas xüsusiyyəti ondan ibarətdir ki, bu hadisə zamanı Yupiter Yerə minimum məsafədə yaxınlaşır, bu məsafə 3.95 astronomik vahid və ya 591 295 396 km təşkil edir. Yupiter gecə səmasında Ay və Veneradan sonra üçüncü ən parlaq obyekt olur.
Sonuncu dəfə bu cür qarşıdurma 2010-cu il sentyabrın 20-də baş verib. 26 sentyabrda baş verəcək hadisədən sonra növbəti dəfə ən çox yaxınlaşmanı isə 2034-cü il oktyabrın 1-də müşahidə etmək mümkün olacaq.
