Ekologiya və torpaqşünaslıq fakültəsində elmi seminar keçirilib
Bakı Dövlət Universitetinin Ekologiya və torpaqşünaslıq fakültəsində onlayn elmi seminar keçirilib. Seminarda Ekologiya və torpaqşünaslıq fakültəsinin professor-müəllim heyəti, doktorantlar, magistrlər və fakültənin digər əməkdaşları iştirak edib.
Seminarda Bioekologiya kafedrasının doktorantı Səbinə Cəfərzadə “Böyük Qafqazın şimal-şərq hissəsinin Pyrus L. cinsi növlərinin in situ və ex situ şəraitində eko-bioloji xüsusiyyətləri” və Torpaqşünaslıq və daşınmaz əmlakın kadastrı kafedrasının doktorantı Günel Əliyeva “Gilgilçay hövzəsi torpaqlarının ekoloji qiymətləndirilməsi və monitorinqi” mövzularında məruzə ediblər.
Səbinə Cəfərzadə məruzədə Böyük Qafqazın şimal-şərq hissəsində yabanı armud növlərinin in situ və ex situ şəraitində ekobioloji xüsusiyyətlərini elmi cəhətdən əsaslandırmaqla perspektivliyinin qiymətləndirilməsi, tədqiq olunan bitkilərin taksonomiyası, xarakteristikası və bioekoloji xüsusiyyətləri, tədqiq olunan bitkilərin çoxalma xüsusiyyətləri, onların abiotik və biotik amillərə qarşı münasibəti haqqında çıxış edib.
Günel Əliyeva məruzədə Gilgilçay hövzəsi torpaqlarının müasir ekoloji vəziyyəti, torpaqların əsas və yekun bonitet şkalasının tətrib edilməsi, ekoloji ballarının tapılması və torpaqların bonitirovka və ekoloji qiymət xəritələrinin tərtibi, Gilgilçay hövzəsi landşaft kompleksləri üzərində ekoloji monitorinqin təşkil edilməsi nəticəsində təbii landşaftların sahəsinin azalması və aqrolandşaftların sahəsinin artırılmasından bəhs edib.
Sonda seminar iştirakçılarının sualları cavablandırılıb.