AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) İnformasiya və sənəd menecmenti fakültəsinin Firudin bəy Köçərli adına Respublika Uşaq Kitabxanasında istehsalat təcrübəsi keçən tələbələrinin yerli və xarici müəlliflərin uşaq ədəbiyyatına dair kitablarının icmalından bəhs edən təqdimatları nümayiş olunub. Təqdimat zamanı tələbələr uşaq ədəbiyyatına dair müxtəlif kitabları redaktor hazırlığı, bədii tərtibat baxımından şərh edib, ayrı-ayrı nəşriyyatların çap məhsulları arasında müqayisəli təhlillər aparıb, bir sıra təkliflər irəli sürüblər. Təcrübə müddətində tələbələr Respublika Uşaq Kitabxanasının strukturu, fondu, elektron kataloq və kartoteka sistemi, oxuculara xidmət işi, sənəd dövriyyəsi, elektron resursları barədə xüsusi bilik və bacarıqlara yiyələniblər. Bu bilik və bacarıqların onların gələcək karyeralarında mühüm rol oynayacağını bildirən tələbələr yaradılmış şəraitə görə kitabxana rəhbərliyinə və mütəxəssislərə minnətdarlıq ediblər.

Sonda İnformasiya və sənəd menecmenti fakültəsinin, Firudin bəy Köçərli adına Respublika Uşaq Kitabxanasının rəhbərliyi və kitabxananın peşəkar mütəxəssisləri tərəfindən tələbələrin təqdimatları müzakirə edilib, irəli sürülən təkliflər dəyərləndirilib, həmçinin tələbələrə tövsiyələr verilib.