AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universiteti (BDU) və “Gənclərin maariflənməsinə dəstək” İctimai Birliyinin birgə təşkilatçılığı ilə Prezident mükafatçıları olan gənclərlə görüş keçirilib.

Tədbirdə Dövlət himni səsləndirilib, Azərbaycanın ərazi bütövlüyü uğrunda canını fəda edən şəhidlərin əziz xatirəsi yad edilib.

BDU-nun Humanitar məsələlər və gənclər siyasəti şöbəsinin müdiri Ramin Səmədov ölkədə uğurla həyata keçirilən dövlət gənclər siyasətindən danışıb, BDU-da fəaliyyət göstərən tələbə təşkilatlarının fəaliyyəti haqqında məlumat verib və həyata keçirilən layihələrdən bəhs edib. O qeyd edib ki, BDU tələbələri ölkənin  ictimai-sosial həyatında və gənclər siyasətinin həyata keçirilməsində fəal rol oynayırlar.

Daha sonra “2 fevral – Azərbaycan Gəncləri Günü” münasibətilə Azərbaycan Respublikasının Prezidenti cənab İlham Əliyev tərəfindən mükafatlandırılan gənclər – ASAN Könüllülər Təşkilatının sədri Emiliya Bayramova və Azərbaycan Respublikası Gənclər Təşkilatları Milli Şurasının sədri Azər Əliyev çıxış edərək təmsil etdikləri təşkilatların məqsəd və vəzifələri haqqında tələbələrə məlumat verib, fəal gəncləri ictimai iştirakçılığın təmin edilməsində aktivliyə dəvət ediblər. Onlar həmçinin şəxsi karyerada uğur qazanmağın yolları, könüllülük fəaliyyətinin təşviqi və ictimai fəallığın gənclərin gələcək karyeralarına müsbət təsirindən danışıblar.

Diskussiya şəklində davam edən görüşdə tələbələri maraqlandıran suallar cavablandırılıb.