BDU rektorunun müşaviri “UI GreenMetric Sustainable University Rankings 2026” konfransının panel müzakirəsində iştirak edib
Bakı Dövlət Universitetinin (BDU) rektorunun müşaviri Asiman İlyasov “UI GreenMetric Sustainable University Rankings 2026” konfransı çərçivəsində keçirilən panel müzakirəsində moderator qismində iştirak edib. “Davamlı təsirin gücləndirilməsi: su ehtiyatlarının səmərəli idarə olunması, yaşıl mobillik və dayanıqlılıq təhsili” (“Driving Sustainable Impact: Water Stewardship, Green Mobility, and Sustainability Education”) mövzusuna həsr olunan paneldə BMT-nin Dayanıqlı İnkişaf Məqsədlərindən “Keyfiyyətli təhsil” (DİM 4), “Təmiz su və sanitariya” (DİM 6), “Davamlı şəhərlər və icmalar” (DİM 11) və “İqlim fəaliyyəti” (DİM 13) üzrə aktual məsələlər müzakirə olunub.
Paneldə Azərbaycanın və bir sıra ölkələrin ali təhsil və müvafiq sahələr üzrə tanınmış nümayəndələri iştirak ediblər. Müzakirələr zamanı su ehtiyatlarının səmərəli və dayanıqlı idarə olunması, yaşıl mobilliyin inkişafı, iqlim dəyişikliklərinə uyğunlaşma, dayanıqlı şəhər mühitinin formalaşdırılması və ali təhsil müəssisələrində dayanıqlılıq üzrə təhsilin təşviqi məsələləri diqqət mərkəzində olub.
Panelin moderatoru Asiman İlyasov çıxışında Dayanıqlı İnkişaf Məqsədlərinin ali təhsil müəssisələrinin institusional inkişafı, idarəetmə və strateji planlaşdırma proseslərinə inteqrasiyasının əhəmiyyətini vurğulayıb. Müzakirə çərçivəsində universitetlərin yalnız bilik və tədqiqat mərkəzləri deyil, həm də ekoloji dayanıqlılığın, yaşıl innovasiyaların və cəmiyyətin dayanıqlı inkişafının təşviqində fəal institutlar kimi roluna diqqət çəkilib.
Qeyd edək ki, “UI GreenMetric Sustainable University Rankings” ali təhsil müəssisələrinin dayanıqlılıq və ekoloji məsuliyyət üzrə fəaliyyətlərini müxtəlif göstəricilər əsasında qiymətləndirən beynəlxalq təşəbbüslərdən biridir. 2025-ci ilin nəticələrinə əsasən, ölkə üzrə lider mövqedə qərarlaşan BDU son illərdə yaşıl kampusun inkişafı, enerji səmərəliliyinin artırılması, su ehtiyatlarının səmərəli idarə olunması, dayanıqlı nəqliyyatın təşviqi, biomüxtəlifliyin qorunması və Dayanıqlı İnkişaf Məqsədlərinin universitet fəaliyyətinə inteqrasiyası istiqamətlərində həyata keçirdiyi layihələrlə bu sahədə fəaliyyətini davamlı şəkildə genişləndirir.
