BDU Özbəkistanın daha 16 universiteti ilə anlaşma memorandumu və əməkdaşlıq müqaviləsi imzalayıb
Bakı Dövlət Universiteti (BDU) 28-29 may tarixlərində Özbəkistanın Əndican Dövlət Universitetində keçirilən “Azərbaycan–Özbəkistan: ali təhsildə əməkdaşlığın inkişafında prioritet istiqamətlər” mövzusunda Birinci Rektorlar Forumunda təmsil olunur. BDU-nun beynəlxalq əlaqələr üzrə prorektoru Şahin Pənahovun iştirak etdiyi forumda Özbəkistanın bir sıra ali təhsil müəssisələri ilə ikitərəfli əlaqələrin qurulması məqsədilə anlaşma memorandumları və əməkdaşlıq müqavilələri imzalanıb.
Forum çərçivəsində BDU ümumilikdə 16 ali təhsil müəssisəsi ilə əməkdaşlıq əlaqələri qurub. BDU ilə Əbu Əli İbn Sina adına Buxara Dövlət Tibb İnstitutu və Mirzə Uluqbəy adına Özbəkistan Milli Universiteti arasında əməkdaşlıq müqaviləsi, Daşkənd Dövlət Aqrar Universiteti, Əndican Dövlət Universiteti, Əndican Dövlət Texniki Universiteti, Nəvai Dövlət Dağ Mədənçiliyi və Texnologiya Universiteti, Səmərqənd İqtisadiyyat və Servis İnstitutu, Fərqanə Dövlət Universiteti, Kokand Universitetinin Əndican Filialı, Kokand Dövlət Universiteti, Özbəkistan Jurnalistika və Kütləvi Kommunikasiya Universiteti, İnformasiya Texnologiyaları və İdarəetmə Universiteti, Özbək-Fin Pedoqoji İnstitutu, Karşi Dövlət Universiteti, Anıq va İjtımoiy Fanlar Universiteti, Səmərqənd Dövlət Memarlıq və İnşaat Universiteti ilə anlaşma memorandumları imzalanıb.
Sözügedən memorandum və müqavilələr universitetlər arasında geniş spektrli əməkdaşlığı nəzərdə tutur. Memorandum və müqavilələrdə birgə layihǝlǝrin, konfrans, sərgi, seminar, simpozium, qısamüddətli kursların, təlimlərin keçirilməsi, ortaq elmi-tədqiqatların aparılması nəzərdə tutulur. Elmi jurnallarda birgə nəşrlər, ortaq akademik proqramların hazırlanması, təlimlərin keçirilməsi, akademik, inzibati heyətin, tələbə, magistrant, doktorant və tədqiqatçıların mübadiləsi kimi məsələlər də memorandum və müqavilələrdə öz əksini tapıb.
