AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) SABAH qruplarının “Azərbaycan dili və ədəbiyyatı müəllimliyi” ixtisasının III kurs tələbələri üçün “1920–1991-ci illər Azərbaycan ədəbiyyatı” fənni çərçivəsində XX əsrdə Azərbaycan ədəbiyyatının istedadlı nasirlərindən biri, tarixi roman janrının görkəmli nümayəndəsi, Xalq yazıçısı, ədəbiyyatşünas alim, pedaqoq, ictimai xadim, filologiya elmləri doktoru, professor Əzizə Cəfərzadənin ev-muzeyində interaktiv dərs keçirilib. Fənnin müəllimi Eşqanə Babayeva tərəfindən aparılan dərsdə tələbələrə yalnız mətnlərlə deyil, həm də ədəbi irs ilə canlı tanış olmaq şəraiti yaradılıb.

Ədəbiyyatı təkcə nəzəri mövzularla deyil, həm də müəllifin yaratdığı və yaşadığı mühitlə birbaşa əlaqədə öyrənmək, elmi düşüncə və tənqidi təhlil bacarıqlarını inkişaf etdirmək məqsədilə təşkil edilən dərsdə tələbələr Əzizə Cəfərzadənin şəxsi əşyaları, fotoşəkilləri və əlyazmaları ilə yaxından tanış olublar. Dərsin gedişində tələbələr Əzizə Cəfərzadənin “Bakı-1501” və “Aləmdə səsim var” əsərləri haqqında təqdimatlar edib, təhlillər üzərində müzakirələr aparıblar.

Sonra ədibin əsərlərinin, xüsusən də "Əzrayıl" adlı ilk hekayəsinin orijinal əlyazmasına baxış keçirilib, professorun həyatı ilə bağlı videolar izlənilib.

Sonda Əzizə Cəfərzadənin oğlu Turan Cəfərzadə müzakirələrdə fəallıq göstərən tələbələrə ədibin kitablarını hədiyyə edib.