BDU-nun nəzdində "Gənc istedadlar" liseyinin şagirdi görmə məhdudiyyətli uşaqlar üçün yeni layihə hazırlayıb
Bakı Dövlət Universitetinin (BDU) nəzdində "Gənc istedadlar" liseyində X sinif şagirdi Samirə Cəfərlinin müəllifi olduğu "TactoColor" layihəsinin təqdimatı keçirilib. Layihə SASMO təşkilatının dəstəyi ilə reallaşıb.
Samirə Cəfərli layihə ideyasının görmə məhdudiyyətli uşaqlarla ünsiyyət zamanı onların rəngləri tanımaqda çətinlik çəkməsini müşahidə etməsindən yarandığını bildirib. Bu çətinliyi aradan qaldırmaq məqsədilə rəngləri toxunaraq tanımağa imkan verən taktil rəngləmə albomları və xətli qələmlər dəsti hazırlayıb.
Layihə uşaqlara yalnız rəngləri tanıtmaqla kifayətlənmir, həm də yaradıcılıq bacarıqlarını və emosional ifadə imkanlarını inkişaf etdirməyi hədəfləyir. Albomlarda hər rəng uşaqların toxunaraq hiss edə biləcəkləri fərqli tekstura və formalarda təqdim olunub.
Təqdimat zamanı uşaqlar üçün interaktiv təcrübə dərsi təşkil olunub. Onlar albomları sınaqdan keçirib, rəngləmə işlərini tamamlayıblar.
Samirə Cəfərli çıxışında "TactoColor"un əsas məqsədinin inklüziv təhsili və bərabər imkanları təşviq etmək olduğunu bildirib. Onun sözlərinə görə, layihə görmə məhdudiyyətli uşaqların öz həmyaşıdları ilə bərabər şəkildə öyrənməsinə, yaradıcılıqla məşğul olmasına və özünəinamının artmasına şərait yaradır.
Layihənin gələcəkdə digər bölgələrdə də təqdim olunması planlaşdırılır.
