BDU-nun kollektivi şəhid məzun Cavid Manafovun ildönümündə məzarını ziyarət edib
Bakı Dövlət Universitetinin (BDU) bir qrup kollektivi Vətən müharibəsində qəhrəmancasına döyüşərək şəhidlik zirvəsinə ucalmış, Sosial elmlər və psixologiya fakültəsinin məzunu Cavid Manafovun ildönümündə ailəsi ilə görüşüb, məzarını ziyarət ediblər.
Ziyarətdə BDU-nun Humanitar məsələlər və gənclər siyasəti şöbəsinin müdiri Ramin Səmədov, Sosial elmlər və psixologiya fakültəsiniun dekan müavini İranə Məmmədli, fakültənin müəllimləri Elnarə Piriyeva, Ramin Allahverdiyev, Səyyarə Yusubova və tələbələr iştirak ediblər. Ziyarətdə çıxış edənlər Cavid Manafovun Vətən torpağı uğrunda qəhrəmancasına vuruşaraq şəhidlik zirvəsinə ucalmasından qürur duyduqlarını, onun qəhrəmanlığının tələbə gənclərə nümunə olduğunu bildiriblər. Cavidin həm müəllimlərinin, həm də tələbə yoldaşlarının qəlbində daim yaşayacağı, gələcək nəsillər üçün örnək olacağı vurğulanıb.
Sonra şəhidin ailə üzvləri və yaxınları ilə birgə məzarı ziyarət olunub, məzarı önünə gül dəstələri düzülüb, ruhuna dualar oxunub.
Qeyd edək ki, BDU-nun 2020-ci il məzunu olan Cavid Manafov Vətən müharibəsinin başladığı gündən Füzuli, Cəbrayıl, Zəngilan və Qubadlı istiqamətində gedən döyüşlərdə iştirak edib. 2020-ci il 31 oktyabr tarixində batareya komandirini xilas edib və digər döyüş yoldaşlarını qurtararkən ağır yaralanıb, 7 noyabrda şəhidlik zirvəsinə ucalıb.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikası Prezidentinin müvafiq sərəncamları ilə Cavid Manafov ölümündən sonra "Vətən uğrunda" və "Xocavəndin azad olunmasına görə" medalları ilə təltif edilib.
