AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

Bakı Dövlət Universitetinin (BDU) Şərqşünaslıq fakültəsinin Orta Şərq dilləri və ədəbiyyatı kafedrasının dosenti, filologiya üzrə fəlsəfə doktoru Əsmətxanım Məmmədova Türkiyənin Ərzurum Atatürk Universitetinin ev sahibliyi ilə keçirilən “Ortak türk fəlsəfi düşüncəsinin dahisi: Nizami Gəncəvi” adlı Beynəlxalq elmi simpoziumda iştirak edib. Tədbir Azərbaycan Respublikasının Ankaradakı Mədəniyyət Mərkəzi, Türk Əməkdaşlıq və Koordinasiya Agentliyi (TİKA), Nizami Gəncəvi Fondu, Türk Mədəniyyəti və İrsi Fondunun birgə əməkdaşlığı çərçivəsində təşkil olunub.
Əsmətxanım Məmmədova simpoziumda “Nizami Gəncəvi yaradıcılığı ilə bağlı filoloji tədqiqatlar” mövzusunda məruzə edib. Alimin elmi çıxışı tədbir iştirakçıları tərəfindən böyük maraqla qarşılanıb.
Azərbaycan və Türkiyədən tanınmış alimlərin, nizamişünasların iştirak etdiyi simpoziumda türk-islam düşüncəsinin formalaşmasında mühüm rola malik olan Nizami Gəncəvinin zəngin ədəbi və fəlsəfi irsi, ortaq mədəni dəyərlər sistemindəki yeri və ümumbəşəri ideyaları elmi müstəvidə müzakirə olunub.
Səfər çərçivəsində iştirakçılar Ərzurum şəhərinin tarixi və mədəni məkanlarını da ziyarət ediblər.