BDU könüllüləri ilə görüş
Bakı Dövlət Universitetinin (BDU) rektoru Elçin Babayev 5 dekabr – Beynəlxalq Könüllülər Günü münasibətilə “BDU könüllüləri” təşkilatının fəal üzvləri ilə görüşüb. Görüşdə bir zamanlar könüllü olan, hazırda isə BDU-nun əməkdaşı kimi fəaliyyət göstərən gənclər də iştirak ediblər.
Rektor könüllüləri əlamətdar gün münasibətilə təbrik edib, onlara işlərində uğurlar arzulayıb. Bildirib ki, BDU-nun ictimai-sosial və təlim-tədris prosesinin təşkilində yaxından iştirak edən könüllülərin fəaliyyəti Universitetin adının daha da yüksəlməsinə və inkişafına xidmət edir. Könüllülər BDU-nu müxtəlif istiqamətlərdə təmsil edərək, həm fərdi inkişaflarına, həm də Universitetin işinə əvəzsiz töhfə verirlər. BDU ailəsinin ayrılmaz parçasına çevrilən “BDU könüllüləri” təşkilatı 2000-dən çox üzvü öz ətrafında birləşdirir. 2019-cu ildən bəri təşkilatın 27 üzvü BDU-nun əməkdaşı kimi çalışmağa başlayıb.
Görüşün sonunda xüsusi fəallığı ilə seçilən BDU könüllülərinə təşəkkürnamələr təqdim olunub.
