AZƏRBAYCAN RESPUBLİKASININ ELM VƏ TƏHSİL NAZİRLİYİ Bakı Dövlət Universiteti

İtaliyanın G. N. Annunzio adına Çieti-Peskara Universitetinin nümayəndə heyəti Bakı Dövlət Universitetində (BDU) olub. Görüşdə BDU-nun beynəlxalq əlaqələr üzrə prorektoru Şahin Pənahov, Elmi fəaliyyətin təşkili və innovasiyalar Mərkəzinin direktoru Mais Süleymanov, Beynəlxalq əlaqələr şöbəsinin əməkdaşları Əsgər Zeynalabdinov, Yeganə Əliyeva və Xarici tələbələrlə iş şöbəsinin əməkdaşı Sevinc Məmmədova iştirak ediblər.

Görüşdə çıxış edən BDU-nun beynəlxalq əlaqələr üzrə prorektoru Şahin Pənahov universitetin fakültələri və əsas fəaliyyət istiqamətləri haqqında məlumat verərək, İtaliya universitetləri ilə elmi-pedaqoji əlaqələrin inkişaf etdirilməsinin vacibliyini vurğulayıb. O qeyd edib ki, BDU xarici universitetlərlə elmi-pedaqoji əlaqələrin qurulmasına, ikili diplom proqramlarının tətbiqi ilə kadr hazırlığına xüsusi önəm verir. Bu baxımdan Çieti-Peskara Universiteti ilə müvafiq sahələr üzrə əməkdaşlıq perspektivləri müsbət nəticələr verə bilər.

Sonra nümayəndə heyətinin başçısı, Çieti-Peskara Universitetinin beynəlxalq əlaqələr və “Erasmus” üzrə baş mütəxəssisi, Beynəlxalq Hərəkətlilik Ofisinin rəhbəri Conte Glauco Antonio, Psixobiologiya və fizioloji psixologiya kafedrasının dosenti Marcello Costantini və Dil Mərkəzinin direktoru Tania Zulli universitetləri haqqında məlumat veriblər. Çieti-Peskara Universitetinin 3 məktəbi və 15 fakültəsi ilə BDU-nun fakültələri arasında əməkdaşlıq istiqamətləri müzakirə olunub və birgə əməkdaşlığa dair təkliflər irəli sürülüb.