BDU-da “Yeni qlobal nizam, dəyişən geosiyasi və geoiqtisadi güc balansı” mövzusunda Respublika elmi konfransı keçiriləcək
14–16 dekabr 2026-cı il tarixlərində Bakı Dövlət Universitetində (BDU) “Şəhərsalma və memarlıq İli” çərçivəsində BDU-nun Beynəlxalq münasibətlər və iqtisadiyyat fakültəsinin 35 illiyinə həsr olunmuş “Yeni qlobal nizam, dəyişən geosiyasi və geoiqtisadi güc balansı” mövzusunda Respublika elmi konfransı keçiriləcək. Konfransın məqsədi müasir beynəlxalq münasibətlər sistemində baş verən geosiyasi və geoiqtisadi transformasiyaların müxtəlif aspektlərinə diqqət yönəldilməsi, qlobal güc balansındakı dəyişikliklərin və regional əməkdaşlığın aktual məsələlərinin yeni konseptual müstəvidə nəzərdən keçirilməsi, bu sahələr üzrə əldə edilmiş elmi nəticələrin tanınmış mütəxəssislərin, gənc tədqiqatçıların və tələbələrin iştirakı ilə geniş müzakirəsi, eləcə də tədqiqatçılar arasında təcrübə mübadiləsinin və elmi əməkdaşlığın genişləndirilməsidir.
Konfransın əsas elmi istiqamətləri aşağıdakılardır:
1. Yeni qlobal nizam və beynəlxalq münasibətlər sistemində geosiyasi transformasiyalar.
2. Dünya iqtisadiyyatında dəyişən geoiqtisadi güc balansı və yeni iqtisadi güc mərkəzləri.
3. Regional və qlobal təhlükəsizlik, münaqişələr və müasir diplomatiya.
4. Beynəlxalq iqtisadi inteqrasiya, xarici ticarət, investisiya axınları və nəqliyyat-logistika dəhlizləri.
5. Azərbaycanın müasir geosiyasi və geoiqtisadi proseslərdə rolu və strateji mövqeyi.
6. Enerji təhlükəsizliyi, yaşıl iqtisadiyyat və dayanıqlı inkişafın qlobal çağırışları.
7. Qlobal transformasiyalar şəraitində şəhərsalma, urbanizasiya və infrastruktur inkişafının geoiqtisadi aspektləri.
Konfransa qısa tezislərin təqdim edilməsi üçün son tarix: 30 noyabr 2026-cı il